Mizoram sorkarin kuminah sawhthing hi kg 3,38,35,182 a lei tawh a. Kum tharah February thla atangin sawhthing lei tan a ni leh dawn.
CM Conference Hall-a nimina Chief Minister Lalduhoma hova Mizoram Agricultural Marketing Board (MAMB) thutkhawma tar lan a nih danin, kuminah sawhthing hi sorkarin kg 3,38,35,182 a lei tawh a, support price pek chhuah zawng zawng chu Rs. 1,37,72,04,477.50 a ni.
Kum thara February 2, 2026 atangin sawhthing hi lei tan leh tura ruahman a ni a. Hmunphiah hi February leh March, 2026 chhunga lei a ni ang a, aieng leh Mizo Hmarcha hi February atanga April thla chhung lei a ni ang a, buhhum hi thla kal ta November atanga lei tan tawhin, kum thar January thla thleng lei a ni dawn tih tar lan a ni.
November 24, 2025 a New Delhi-a neih zawh tak, Mizoram sorkar leh NITI Aayog buatsaih Stakeholders Consultation for Mizoram Ginger Produce chungchang report a ni a. He thutkhawmah Mizoram state puala New Delhi-a official meeting lian ber a la nia hriat a ni a. Sorkar laipuia Ministry hrang hrang aiawh leh sawhthing leitu leh process-tu investor 60 chuangten Mizoram sawhthing lei leh hralh chungchang inrawnkhawmna an nei a ni a. He hunah hian NITI Aayog chuan Mizoram chu ‘Ginger Capital of India’-ah a puang a. Hei hian Mizoram chu sawhthing quality tha neitu state a nihzia a tichiang hle tih tar lan a ni.
MAMB hian December 5-6, 2025 hian Aijal Club-ah sawhthing Buyer-Seller Meet nei turin hma a la mek a, India ram hmun hrang hrang atangin hetiang lama tui mite an lo kal khawm dawn a. He mi atana an inbuatsaihnate an thlir ho va, hmalak mekna chu tha an ti a. Sawhthing thar lei thei tur hi Buyer-Seller meet lo awm turah hian inremna ziahpui theih beisei a nih thu thutkhawmah hian tar lan a ni bawk.