Aizawl: December 1 hi World AIDS Day 2025 a ni a, Mizoram hmun hrang hrangah he ni pual hian hun hman a ni a. Aizawlah chuan Vanapa Hall-ah Mizoram State AIDS Control Society (MSACS) bultumin hman a ni a. Assembly Speaker Lalbiakzama chu khuallian a ni.
Khuallian Assembly Speaker Lalbiakzama chuan thu sawiin, HIV darh zel tur ven kawngah theihtawp chhuah turin Mizoram mipui a ngen a; mutmawh hnarmawha an neih a tul thu a sawi a. Khawvel changkang zelin a ken tel chu natna thar anih thu a sawi a, khawvelin natna a buaipui langsar tak chu HIV/AIDS niin, India ram state hrang hranga mihring cheng zat atanga chhutin Mizoramah HIV/AIDS vei an tam ber chu pawi a tih thu a sawi.
Lalbiakzama chuan Mizo Kristianna nen inmil lo takin an inkaichhawnna tam ber mipat hmeichhiatna a ni chu a zahthlak hle tih a sawi a, HIV kai hmuhchhuah zinga zaa 65-te chu mipa an nih thu leh, Mizo mipa te an inenfiah a, tan an lak a pawimawh thu a sawi bawk.
MSACS Project Director Dr. Jane R. Ralte sawi danin, Mizoramah a hmasa ber atan October 1990 khan HIV positive hmuh chhuah a nih thu leh kum 1990 atanga thla liamta, October thleng khan Mizoramah HIV vei mi 33,641 hmuhchhuah an ni tawh a. Mizorama HIV vei zaa 70.3 chu mipat hmeichhiatna atanga kai niin, inchiuna hriau inhmantawm avanga kai zaa 27.3, nu-in a faa a kai zaa 1.8 leh kaina chhan hriat loh zaa 0.74 an ni.
Mipat hmeichhiatna atanga HIV vei zinga zaa 55.3 hi kawppuite atanga kai an ni a. Hriatchian lohte nena mipat hmeichhiatna hman atanga kai zaa 34.3 an awm a, sex atanga HIV vei zingah hian mipa mahni anpui kawp atanga inkaichhawng zaa 7.7 an awm a; mahni inzuarte atanga kai zaa 2.5 an awm bawk.
Dr Jane Ralte chuan sex atanga HIV vei hmuhchhuah zingah kum tin mipa, mahni anpui kawp atanga kai an pung chho zel tih sawiin, HIV chu a hlauhawm a, a enkawlna ART damdawi a awm avanga hlau lo an awm thin nia hriat a nih thu leh, ART chu natna chak tak hmetmit tura duan a nih avangin a chak a, taksaah side effect hrang hrang a neih thin avangin HIV vei lo tura an nun hmang turin Mizoram mipui, a bikin thalaite a sawm.
World AIDS Day 2025 pual a hun hmannaah hian HIV/AIDS dona kawnga thawktha, field hrang hranga hma nasa taka lo latu leh bul lo tantu, mi paruk – Dr C. Lalhmingliana, Dr RL Sanghluna, Dr Chawnglungmuana, Lalparmawii, Lucy Remruati Chhangte leh Lalmalsawmi (Mal-i) te hnenah chawimawina hlan an ni.