Aizawl: MPCC President Lal Thanzara’n ZPM party chu a tute pawh inpawm lo kual vel vekah a puh a. MNF leh ZPM sorkar rintlak loh lutuk chu Congress party timawitu an ni tih a sawi.
Thawhlehnia Champhai South Block Congress Committee buatsaihin Special Block Conference hmanpuitu MPCC President Lal Thanzara chuan, Chief Minister adviser TBC Lalvenchhunga’n CM adviser a nihna banna a thehlut a, Chief Minister-in a pawm lo va, Chief Minister thu chu banna theh luttuin a pawm bik lo va, ZPM party chu a tute pawh hi an in pawm lo kual vel vek tih a sawi.
MNF leh ZPM sorkar rintlak lo lutuk hi Congress timawitu an ni tih sawiin, “Mizoramin Congress party kan mamawhzia a tichiang. Congress a sorkar loh apiangin Mizoramin harsatna leh manganna kan tawk. Eizawnna a harsa a, mipui nun a ralti. Congress party a sorkar apiangin Mizoram mipuiin malsawmna dawngin an thla a muang a, thlarau hlimna a thleng thin. Ram hi Lalpa ta a ni a, Pathian thu lovin tumah roreltu an awm lo,” a ti a. Roreltute chu Pathian ruat an ni a, ni tha lova roreltu atana ruat an ni emaw tih turin MNF leh ZPM sorkarah Mizoramin harsatna leh buaina namen lo a tawk thin tih a sawi.
Lal Thanzara chuan, “Congress party chu kum 139 leh ni 338 a ni tawh a. Hemi chhung hian India leh Mizoramah party tam tak an zuih ral tawh a. Chutiang hlau chuan tunah ZPM leh MNF-in a ral lo zawk nih inchuhin an hmanhlel tawh,” a ti a. Congress erawh a tho leh thin a, mipuiin sorkar turin an duh a, tang nasa turin an duh a. Aizawlah enchhin châka tuihala ZPM vote-tuten an vote lak kir leh duh khawpin enchhin sual an intihzia chu an thunawn a nih thu a sawi.
MPCC thupuangtu, Dr. Lallianchhunga pawhin MNF leh ZPM sorkarah mipui an him lova, mipuiin ram hruaitute an deusawh leh nuihzat hun a thleng a. Hun kal tawha Mizoram mipui himna leh hlimna Congress sorkar laia thleng kha tunah hian Mizoram mipuite an pe leh dawn tih a sawi. Congress sorkar chiah mipui mimir hnen thleng phak zarzo theih sorkar a la awm tih sawiin, Congress, MNF leh ZPM Party-te an sorkar vek tawh a, tu sorkar nge rintlak tih Mizoram mipuiin an buk mek niin a sawi bawk.
Special Block Conference-ah MPCC President Lal Thanzara’n an party-ah mi thar eng emaw zat a lawm luh bakah, kalkhawmte hian reolution an pass bawk.