Sports Minister Lalnghinglova Hmar-in a bial chhunga zirna in pathum – MICE, Tuikual North; Gairigaon Primary School, Dinthar leh Govt. Middle School – II, Dinthar te hnenah tanpuina sumfai, Rs nuai 3 theuh a pisa-ah a hlan.

Aizawl West II bialtu MLA ni bawk, Lalnghinglova Hmar hian November 4, 2025 khan a bial chhunga sorkar sikul parukte hnenah study tour neihna tur Rs. 3,49,940 a lo pe tawh bawk a. November leh December thla chhungin school hrang hrang hrang puih nan Rs. 6,49,940 a hlan tawh a.

Tun tuma tanpuina sum a hlan sikul, MICE leh Dinthar Govt. M/S-II te hi study tour an neih tura zirtirtute thawhkhawm doletna niin, Gairigaon P/S hi school thutthleng leh dawhkan siam thatna tur a ni.

Hemi pual hun buatsaihah bialtu MLA chuan sorkar sikulte hi mipui dinhmun hrang hrang huapzo an nih thu sawiin, “Dinhmun harsa zawka awmte tan pawh kal theihna a ni thin. Chuvangin, hma lam pana kan kal zelna turah engtin nge zirlai tam zawk kan neih theih ang tih ngaihtuah a ngai a, hmunhma leh bungruaah pawh hma an sawn zelna tura tan lak a ngai a ni,” a ti a. Tun hnaiah a bial chhunga sikul thenkhatin an zirtirtute inpekna avangin state dangah an zirlaite an zinchhuahpui thei a. Sikul danga an tih theih loh kha sorkar sikul in an ti thei a, an zirtirtute inpekna vang liau liau a nih thu a sawi bawk.

Zirlai tithate lawmpuina hun buatsaih

Aizawl West II bialtu MLA Lalnghinglova Hmar, sports minister chuan a bial chhunga zirlai ti thate lawmpuina hun nimin khan MINECO-a a pisa-ah a buatsaih.

Bialtu MLA Lalnghinglova Hmar hian a bial chhunga zirlai tithate lawmpuina hun a buatsaih tum thumna a ni a. Tun tumah hian result chhuak tlai zirlai mi paruk hnenah lawmpuina thu ziak leh Rs 10,000 theuh a hlan.

Zirlai lawmpuina hun buatsaih a nih chhan sawiin Tourism Minister ni bawk, Lalnghinglova Hmar chuan, “He programme kan siam thin chhan hi in hlawhtlinna kan lawmpui che u piah lamah, kan bial chhunga naupang zawkten zirlai a hlawhtlinna sang neite hmelhriat se, entawn se kan duh vang a ni,” a ti.

Tun hnaiah a bial chhungah zirlai titha chawimawi tur an nei chho zur chu lawmawm a tih thu sawiin Lalnghinglova Hmar chuan, “Zirlai titha lawmpui hi thil danga hlawhtlinna inlawmpui ang erawh a ni lo deuh a, hmalam pana ke pen lehna tur a awm zel avangin tun hi chu a aia sang zawk thleng tura in beihna tur chauh a ni,” a ti a. Tuna an zirlaia an tihthatah hian duhtak mai lo vin, eizawnna leh hlawhtlinna lian zawk an neih ngeina turin hmalam an pan zel turin a fuih bawk.

Zirlai titha lawmpuina hlante:

1. Lalnunkima s/o Zoramchhana, Tuikual North – NEILIT Aizawl, MCA Topper
2. Lalmuansanga s/o Rengthanga Colney, Kanan – MZU, 1st in B.Tech (Civil)
3. Malsawmdawngliani d/o Jenny Lalthansangi, Vaivakawn Zohnuai – MZU, 3rd Position in MBA (Hospitality and Management)
4. Sanglianmawii Pachuau d/o PC Ruatmawia, Dawrpui Vengthar – MZU, 4th Position in MBA (Hospitality & Management)
5. Lalnuntluangi d/o PC Lalnipuii, Dinthar – MZU, 6th rank in M.Sc (Physics)
6. Lalbiaknungi d/o Lalchhuanmawia, Dawrpui Vengthar – MZU, 8th Position in MBA