Cameroon chuan Africa Cup of Nations (Afcon) khel tur player hming an puang a, an zingah hian Andre Onana a tel lo va, hetah hian DR Congo pawhin an player langsar, Yoane Wissa tel lova khelh an tum bawk.
Cameroon hian inelna lian hmachhawn tura an inbuatsaih mek lai hian coach Marc Brys chu an ban bawk.
Cameroonian Football Federation (Fecafoot) president atan Samuel Eto’o chu thlan nawn a ni a; Barcelona leh Inter Milan striker hlui leh a executive committee chuan Brys -a hi ban a nih thu an puang a, a hna hi kum hnih a thawk tling hman lo.
Nikum April khan Cameroon sports ministry chuan Brys hi coach atan an lalut a; mahse, Eto’o rawn lang lehin a ban leh ta zawk a, tun hma lama Cameroon team lo enkawl fo tawhtu David Pagou chuan an ram team hi a kaihruai rih ang.
Afcon hi December 21 atangin Morocco-ah khelh a ni dawn, goalkeeper Onana bakah hian player langsar zingah – captain Vincent Aboubakar, Napoli midfielder Andre-Frank Zambo Anguissa leh defender Michael Ngadeu te chu koh zingah an tel lo.
Anguissa hi chu hliam vangin a inkhel thei lo, player langsar dang erawh an koh loh chhan pawh sawi lan a ni lo thung. Player a nih laia hlawhtling tak Samuel Eto’o hian a thuneihna a hmang dik dawn em tih chu kan hre thuai ang.
Hetih lai hianh DR Congo awhin an player neih langsar ber pawl, Wissa chu squad-ah an telh lo va, Newcastle United striker tel lo hian an tha tawkah an inngai.
Chutihrual chuan Congo thutlukna hi a hriatthiam awm viau – Wissa hian nipui transfer lai khan Magpies hi pound maktaduai 55-in a zawm a; mahse, international break-ah inhliam zuiin, tun season-ah Magpies tan a la inkhel lo.
Tun hnaiah Wissa hi dam tawh mah se, DR Congo hian a hlawh petu Magpies chhuhsak leh nghal hi an duh lo ni berin a lang a, Newcastle tan chuan AFCON laia an player lei thar an chân lo tur hi thu lawmawm a ni
ang.
Congo tana vawi 35-a goal riat khungtu Wissa hian season hmasa khan Brentford tan inelna hrang hrangah match 39 khelin goal 20 a khung a, Magpies hian Alexander Isak chân thei dinhmuna an din khan an rim zui.
Premier League-a tlangnel sa forward hi an duh angin chhawr thei nghal lo mah se, Germany atanga an lakluh, Nick Woltemade a che tha a, inelna hrang hranga vawi 14 bul a tan atangin goal sarih a khung tawh.