Aizawl: Mizoram sorkarin Aizawla Assam Rifles ram chhuahsan hman tangkai dan tur rel tur, Advisory Committee on Assam Rifles Land atangin Mizoram Pradesh Congress Committee (MPCC) an inhnukdawk.
An inhnuhdawh thu hi Nilaini khan Chief Minister Lalduhoma hnenah lehkha an theh lut.
Lehkha an theh luhah MPCC chuan advisory committee rorel dan leh an kalpui danah an party-in hmathlir an lo neih ve nen inperhsan tak tak thutlukna siam a nih tak zel avang te, ram awl chhungah building lian mipui kalkhawmna ang chi hi dah loh nise tih hi an duh dan a nih avang te, mi mal leh pawl bakah sorkar pawhin office leh building dang pawh sak leh dah loh ni bawk se, thingkung hrang hrang phun belh a, Aizawl Central Park cum Botanical Garden atana cheibawl leh khawpui vawng daia boruak tha petu atana buatsaih hi Aizawl mipui leh thalaite duh dan pawh ni ngeiin a lang a, khawvel leh India ram khawpui dangte pawhin an neih leh an awh em em siam ve theihna hun leh hmun neih hi bawhpelh a, tihbawrh ban loh hram hi an duhdan a nih thu bakah, Lammual chhuahlam a kawngpui laih pawh hi thil tullo leh sawlai hmun tihmelhem leh tiderthawngtu tur ani dawn tih hi an hmuh dan a nih thu an tar lang.
Bazar Bungkawn bottle-neck tihziaawm nan hmun thawveng leh tangkai zawk buatsaih nan Assam Rifles damdawi in tlang erawh hlan phal ni se, chhak lam nek thei ang ber leh zangkhai thei ang berin Multi-Level Parking sak ni se, flyover hmangin chhim lam atanga lirthein Armed Veng chhuk tur kaltirin traffic innek buai zual a tihnep theih bawk a. Hemi atana remruatna hrang hrangte pawh en ho a ruahman theih a nih thu an tar lang bawk.
MPCC chuan, “Sorkar rawtna mai nilo, pawl hrang hrang ten rawtna an neih te en ho a, tun aia zau zawk a sawiho leh inrawn tlan a tul kan ti a. A hmunhma humhim leh enkawl zel dan tur pawh tunai felfai zawk a siam vat ni bawk se,” tia an rawtna leh duh dante sawi ho va, hmalak chhunzawm theih nise an ti in, chuting zawnga Advisory Committee hian hma a la chhunzawm anih chuan theihtawp chhuah ve zel pawh an inhuam a. Mahse, tuna kalpui an tum dan hi chuan MPCC chuan tel ve zelna chi ah an ngaih loh avangin, Advisory Committee atanga an inhnuhdawhna an hriattir thu an tar lang a ni.