India sorkar chuan kum 2027-ah chhiarpui census a nei dawn a, hei hi June 16, 2025 khan Gazette pawh tihchhuah a ni tawh.
Census hi thawh hniha kalpui a ni dawn a. Phase I-ah House Listing leh Housing Census a ni ang a, April leh September, 2026 chhunga neih tur niin Phase II-ah Population Enumeration tih tur a ni a, hei hi February, 2027-ah a ni ang.
Population Enumeration hi Ladakh leh vur tlak thinna hmun dang tih lohvah chuan March 1, 2027-ah peih tur a ni a, heng hmun bikah hian September, 2026-ah neih a ni thung ang.
Chhiarpuiah hian chi bil inchhiarna pawh Cabinet Committee on Political Affairs-in April 30, 2025-a thu a lo tihtluk tawh angin neih a ni ang.
Union State Home Minister Nityanand Rai-a’n Lok Sabha rorel inkhawma Thawhtannia zawhna ziaka a chhannaah, “Sorkarin Census hi kum 2027-a neih turin a ti a, Gazette-ah pawh June 16, 2025 khan chhuah a lo ni tawh a ni,” a ti.
Population Enumeration hi Ladakh leh Jammu & Kashmir leh Himachal Pradesh leh Uttarakhand-a vur tlakna hmunah chuan September, 2026-a neiin October 1, 2026-ah peih fel tur a nih thu Rai-a chuan a sawi.
Caste enumeration chu a vawi khat nan kum 70 chuang hnuah neih leh nghal tur a ni a. “Cabinet Committee on Political Affairs-in April 30, 2025-a thutlukna a lo siam tawh angin hei hi tih tur a ni ang,” a ti.
Tun tum chhiarpui hi India-a digital census neih hmasak ber tur niin data chu mobile app hmanga lak khawm tur a ni a, inbiakpawhna that lohna hmunah erawh lehkhaa inchhiar kalpui a ni tho dawn bawk.
Digital census atan hian November 10 leh November 30, 2025 chhungin digital platform, survey method leh logistic enchhin hmasak a ni dawn bawk.
India-ah hian chhiarpui hi kum 10 danah neih thin a ni a, kum 2021 kha inchhiar hun pangngai ni mah se COVID-19 leng avangin neih theih loh a ni.