Aizawl: Lai Autonomous District Council (LADC) inthlanpui neiha vote thlak chu Nilaini khan tluang taka zawh fel a ni a. Vote thlak theih hun chhung tlai dar 4 thleng khan vote za zelah 80.21 a tla.
LADC inthlanpui neihah zing dar 7 atang khan mipuiin an aiawha LADC-a rorel tur thlangin vote an thlak tan a, vote hi tlai dar 4 thleng thlak theih a ni a. Chhan eng emaw avanga vote thlak that ngai a awm a nih chuan Ningani hian vote thlak that a ni ang.
Vote tlate chu December 9 khian zing dar 8 atangin Govt. Lawngtlai College-ah chhiar tan tur niin, inthlan kaihhnawih hrang hrang chu December ni 12-ah zawh fel vek tura ruahman a ni.
MDC seat 25 awmnaah hian vote nei mi 56,873 an awm a, heng zingah mipa 27,854 niin, hmeichhia 29,019 an awm a. Vote tla zawng zawng hi 45,617 a ni a. Za zelah 80.21 a tla a ni.
Tun tum LADC inthlanpuiah hian candidate 80 awmin, ZPM chuan bial awm zawng zawng bial 25 an chuh kim a. MNF-in bial 20-ah candidate neiin, Congress-in bial 14-ah candidate an nei a, BJP-in bial 10 candidate neiin, Independent-a chuh mi 11 an awm bawk.