Aizawl: Information Public Relations, Printing & Stationary (IPRP&S) Minister B. Lalchhanzova’n Mizo zinga International Film Festival of India (IFFI)-a Indian Panorama (Feature film) jury member atana thlan hmasak ber Napoleon RZ Thanga hnenah chawimawina a hlan.
MINECO-a minister pisa-a nimina chawimawina inhlanah thu sawiin B Lalchhanzova chuan, Napoleon-a chhuanawm a tih thu leh India ram pum huapa ngaihhlut hlawh leh mi tam tak tel chakna IFFI-a Indian Panorama jury member-a thlan a ni chu Mizoram tana mellung pawimawh tak a nih thu a sawi a. Mizoram chu kum hnih thum kalta atanga film lama a thang nasa chu lawmawm a tih thu sawiin, Mizoram economy atan a that bakah thalaite tan eizawnna siamtu pawimawh tak a nih rualin, Mizoram pawna film festival hrang hrang thleng pha tur film quality tha siam a pawimawh thu a sawi a. Mizoram film industry a than zel nan leh film tha zawk siam a nih theih nan tan lak a ngaih thu a sawi.
Napoleon-a hian kum 2006 atang khan film siam tanin, documentary 20 chuang leh short-film pali a siam tawh a. A film siamte hi film festival hrang hrangahte chhuah a lo ni tawh a. Hmeichhe naupang ri hriatna thalo chanchin documentary-a a siam, ‘Malsawmi’ chuan kum 2010 khan 1st Festival of North East Film 2010, Shillong-ah best film leh best direction lawmman dawngin, ‘We Care Film Festival’ New Delhi-ah 3rd best film lawmman a dawng bawk a ni.
Ministry of I&B-in a buatsaih Mumbai International Film Festival-ah (MIFF) kum 2016 khan film selection member-ah a tel a, Cannes Film Festival-ah kum 2023 khan North East Delegates zingah Mizoram aiawhin a kal tawh bawk a. Kumin IIFI vawi 56-naah khan Indian Panorama (Feature film) jury member atana thlan mi 12 zingah a tel a ni.