Aizawl: Animal Husbandry & Veterinary (AH & Vety) Deparment, Lunglei District chuan kum 2024 chhunga vawk pul hri, African Swine Fever (ASF) avanga vawk thite zangnadawmna Rs nuai 47.52 chu ASF tuartu chhungkaw 599 te hnenah an pe chhuak.
Lunglei District chhunga vawk thi 1,188 tana pek chhuah niin, thawh thuma pek chhuah a ni a; a hnuhnung ber hi a dawngtu turte bank account-ah December ni 2, 2025 khan thun fel a ni.
African Swine Fever hi Mizoram State Disaster Management Authority chuan kum 2024 chhung atan State Specific Disaster-a a puan avangin kum 2024 chhunga ASF avanga vawk thite hi State Disaster Response Fund (SDRF) atangin chhawmdawlna pek theih a ni a. Chhawmdawlna hnuaiah hian vawk thi pakhat tan Rs 4,000 zel pek theih niin, chhungkaw pakhatin vawk thi 6 thlengin chhawmdawlna an dawng thei a ni.