AZL: I&PR Minister B. Lalchhhanzova’n nimin khan Aizawl Press Club-ah Lallunghnema lehkhabu ziah, ‘Consumer-te Zin Kawng’ a tlangzarh.
Tlangzarh inkhawmah B. Lalchhanzova chuan, lehkhabu ziaktu Lallunghnema inpekna leh hnathawhte chu ropui a tih thu sawiin, consumer-te dikna chanvo humhalhna kawnga tanrual a tulzia a sawi a. Consumer-te hamthatna tura sorkar hmalakna chi hrang hrang a sawi bawk.
Minister chuan ‘Consumer-te Zin Kawng’ lehkhabu chu mipuiin an hlut a tulzia leh consumer rights chungchanga hriatna zau zawk petu a nih a beisei thu a sawi a. Mipui chanpual pekchhuahna kawnga mipui, sorkar leh NGO-te thawhhona tha neih a tulzia a sawi bawk.
Tlangzarh inkhawm hi Lalsangpuia, Vice Chairman, Centre for Consumer Education chuan kaihruaiin, Dr. K. Lalnghinglova, Treasurer, Centre for Consumer Education-in lehkhabu thlir lawkna hun a hmang a. C. Rohnuna, Secretary, Centre for Consumer Education-in kawlkhawmte hnenah lawmthu a sawi a ni.