Miley Cyrus leh Maxx Morando te chuan lang lo tura thuhruk engmah awm lo turin an inkawp nghet tih an lantir veleh ta a, an inhual ve ta rup mai.
‘Flowers’ singer leh a inhualpuipa Maxx te hi kum 2021 atang khan lo inzui tawhin, anmahni lam erawh chuan thuchiang engmah an nei duh lo reng a, vantlang hmaa inhaw lo taka an awm dun lai hmuh fo an nih tak hnu leh red carpet an zawh dun fo tak hnuah an inhualna chu a mai mai lo a ni tih tifiah turin December kan chuankai chiah khan an inhualna zungbun an rawn tarchhuak ta vang mai.
Cyrus kawppui Maxx hi media hmachhawn tlem tak leh helam kawnga inkiltawih tak nia sawi a ni a, anmahni hrechiangtute sawi dan chuan Miley nunkawng nasa taka her danglamtu leh a innghahna, a tana mipa tha ber niin an sawi.
An inzuina a rei tawh ngaihtuahin an inkawp ngei em tih erawh finfiah lawk theih an ni lo a, mahse pan lovah tho a fu ngai lo an tih ang deuhin hmun hrang hrang leh event lian tak takah an inkawp chawt avangin ngaihven ruk an nihna erawh a rei tawh thung.
An inhualna a awm ta chung pawh hian an chungchang han hriat zui thui tur a awm lo viau bawk a, inneih an tum hnaih leh hnaih loh chungchang mai ni lo, engtinnge awm zel an tum chungchang pawh hriat ni lo mah se, hei erawh a chiang thung, Miley Cyrus hian ‘engagement ring’ a bun va tawh a, Maxx nen hian an innei thuaia rinna pawh a lian lo thei lo a ni.