Asian chhim lam ram hnih, Pakistan leh Afghanistan ten an inkar khi siam tha tura inbiak an thar tawh leh chuan rah tha a la chhuah chuang lo va, inkahhai puang mah se a derthawng hle.
Saudi Arabia-ah kartawpah khan Qatar, Turkey leh Saudi Arabia thlenin an inbia a, October-a nasa taka ramria an inbeihna tihtawp hlen an tum a ni.
Doha-a inkahhai puang tura inremna kha hun rei zawk daih tur leh inremna tluantling a awm theih nan thla hmasa khan Istanbul an inbiak chhunzawm a, hetah pawh hian inremna an lo nei thei lo tawh.
Afghan thuneitu pathum leh Pakistani pahnih chuan chuan Reuters hnenah Saudi hmalaknaa inbiaknaah hian Pakistan-a sipai, intelligence services leh foreign office aiawhte pawh an tel tih an sawi.
An pahnih hian inkahhai chu ken tlang zel rih ni se an ti ve ve.
Islamabad chuan Afghan-a awm helhovin Pakistan-ah beihna an thlen nasa nia sawiin Afghan mite ngei pawh thihchilh bomb tihpuahnaah an inhnamhnawih niin an sawi a. Kabul chuan hei hi phain Pakistan chhunga himna derthawngah inrawlhna an nei lo niin an awi.
Afghan Foreign Minister Amir Khan Muttaqi-a chuan an inbiakna hmun leh Saudi Arabia-a inbia an nei em tih pawh a sawi lo.
Muttaqi-a hian Islamabad-in Afghan leilungah Pakistan dotu hel an awm nia puhna chu a pha a, “Kan duh chu Pakistan nena kan inkar hi sawihova inhriat thiam tawn a ni,” a ti a. “Pakistani thuneitute pawh anmahni buaina chu inngaihtuaha Islamic Emirate muanna atana rahbi a tuk hi zawh turin kan duh a ni,” a ti.
Pakistani foreign ministry, sipai leh Saudi sorkar chuan engmah inbiakna chungchangah sawi an la nei lo thung.
October thlaa ram pahnihte ramria an inbeihna kha kum 2021-a Taliban-in Afghanistan-a thuneihna an chan leh hnuah a nasa ber a ni.
Islamabad chuan Kabul lakah hian an rama Pakistan dotu helho laka kut a thlak dawn tih ziak ngei an a dah a phut a. Taliban chuan hei hi chu an mawhphurhna piah lam niin Pakistan-a himna dinhmun an ngaihtuah thei lo niin an sawi ve thung.