India-ah ram 200 chuang atangin zirlai 72,218 an awm mek.
Rajya Sabha rorel inkhawm kal meka Nilainia zawhna leh chhanna huna zawh belhna chhangin Union State Education Minister Sukanta Majumdar-a chuan ram chhunga World Class Institutions scheme hnuaia Institution of Eminence (IoE) status nei sorkar zirna in pariat hnenah Rs. vaibelchhe 6,198.99 pek a nih thu a sawi bawk.
Majumdar-a chuan QS World University Rankings (QS WUR) 2026-ah ram chhunga zirna in sang 54 lai an lan phak thu sawiin kum 2014-15-a BJP an sorkar tirh kha chuan zirna in 11 chauh an la lan phak thu a sawi.
Majumdar-a chuan, “India hian ram dang zirlai 72,218 a kawl mek a, heng mite hi zirna hrang hrang zira ram 200 chuang atanga lo kalte an ni,” a ti.
Sorkar laipui chuan ram dang zirna in tha leh zirlaite nena inpawhna tha neiha tam zawk zirlai an awm theihna turin hma a la mek zel bawk tih a sawi.
Majumdar-a hian ministry-in World Class Institutions scheme siamin hei hi zirna inten IoE status an neihna tur a ni a. Hetiang status an neih theih nan hian ,i mal leh sorkar enkawl zirna in sang 10 ve ve hnenah sum pe tawhin world-class zirna leh research institution an nih theihna tura puihna a nih thu a sawi.
IoE status nei thei tawh hi zirna in 12 a awm tawh thu leh heng zinga pariat hi sorkar hnuaia mi niin mi mal hnuaia mi pali a awm tawh bawk tih a sawi.
“He scheme hnuaia sorkar zirna in hnena sum pek tawh chu Rs. vaibelchhe 6,198.99 a ni,” a ti.
National Education Policy (NEP), 2020 hman mek chuan zirna in sang, higher education institution (HEI)-ah kawng hrang hrang – hmunhma leh bungraw neih that, research leh thil thar chin chhuahna kawnga hmalakna, industry nena inzawm thei tur zirna tha a awm theihna tur chu a tum ber a nih thu a sawi bawk.
“Sorkar laipuiin NEP inkaihhruaina hnuaia hma a lakna hian Indian HEI-te hi khawvel huapa tha tehnaah a tisang chak em em a ni,” tiin minister chuan a sawi.
QS WUR-a lang phak Indian HEI zat hi kum nga chhungin a let a ni tih tar langin kum 2021-a 27 chauh chu tunah chuan 54 an lang phak ta tih a sawi.