Aizawl: September, 2024 atanga December 4, 2025 thleng khan tui leak report-na application kaltlangin tui leak vawi 350 report a lut tawh a. PHED Minister Prof Lalnilawma’n tui leak report tha mi pathum hnenah chawimawina a hlan.
Ningania Conference Hall, E-in-C PHED Office-ah tui leak report-na App hman tha zualte chawimawina chu PHED Minister hian hlan a. Minister chuan tui leak report-na app chu a vil ve reng thu a sawi a. He app kaltlang hian tui luang ral tur litre tam tak an veng thei a, department hmalakna tur chin chu a theih anga ranga an siamthat zel thu a sawi a. Cluster atanga mi mal connection leak a lo awm erawh chuan a neitute siam that tur a nih thu leh an siam vat loh chuan connection tihtawpsak pawh danin a phal tih a sawi a ni.
Minister-in tui leak report-na app hmang tha zual mi pathum – tui leak vawi 40 report-tu, PB Lalkrosmawia, Tanhril hnenah Rs. 10,000 a hlan a, pahnihna F Lalhmangaiha, Chanmari chuan vawi 12 report tawhin Rs. 7,000 a dawng a, vawi kua report tawhtu, RK Nithanga, Chanmari hnenah Rs. 5,000 hlan a ni bawk.
September 5, 2024-a tui leak report-na application tlangzarh a nih atanga December ni 4, 2025 thlengin report 350 a lut tawh a, thla tina report 23 lut ang a ni.