- K. Hmingthankaia
Kei Mamuli Aadmi satliah ve mai hian ka vei phak loh loh tur vei hian ka lo buai ve em em thin a. Hei, tunah pawh kan Small Hydel Project thenkhat ho outsource tum chungchang velah hian ka lo buai leh ta pek a nih hi. Ka hriat phak loh lutuk thil a nih avang hian a sawi hnuhnung apiang thu sawi hian min tibuai em em zel lehnghal a.
Hydel project tenau tam tak pawisa tam tak senga kan lo siam tawhte khan mimal tutute emaw chu tihausa hle mah se, mipui lo beisei anga power hnianghnar leh hahdamthlak tak, mumal taka min neihtir chuan thin si loh avangin, hydel project lam sawi reng reng hi chuan ngaihthat lohna leh rinhlelhna ka lo nei nghal ringawt zel a, a phurawm loh hi ka lo ti ve nghal ngawt zel a ni. Mahse, state sawrkar ve reng ruangin a lo siam tawh si chu thirchhe hralha hralh ral ngawt theih a ni tawh si lova, enge maw chu tih a tul si a nih hmel hi.
Tunhma atang khan hydel project chungchang hi P&E Engineer-te ka lo zawt ve zauh zauh tawh thin a. ‘ Enkawl tha theiin power generate tha thei ila chuan a hlawk alawm. Mahse, kan sawrkar sum hian a enkawl tha zo tlat si lo alawm’ tiin min chhang thin. Chuvangin, tunah pawh hian enkawl zawh loh avanga HP thenkhat hluihlawn tawh leh hluihlawn mai hmabak ho hi sawrkar chuan company hnena hlan chhawn mai tha tiin, hlan chhawn dan kawng a zawng mek niin a lang. Ngun taka ngaihtuah hnua ram hmangaihna tak tak rilru atanga lo chhuak a nih chuan a tha turah lo ngai tlang mai ila.
Nimahsela, outsource tul lo ti pawl leh, heng HP te hi a hlawk reng a ni tia, dik hmel deuh deuha rawn chhut chhuak pawl an awm bawk a. Sawrkar chu thil kal tluang lai reng tih khawloh tum leh vai company-te nen inthuruala kan ram tan thil tha lo tih tuma ngaih theih lek lektein an rawn sawi bawk a ni. Sawrkar lam hian rawn sawi chiang ve se ka tih mek laiin, P&E Minister-in outsource kan thatpui tur thu chu a tlangpuiin a rawn sawi ta a.
Mahse, hetianga outsource rawn sawi hnawmtute hi, an tih dan pangngaia sawrkar thil tih tum apiang sawisel leh do tum zel opposition ho an ni tih chu hre mah ila, outsource leh an hlan tum deuh nia lang Kundan company-te rawn sawihnawm zingah hian P&E Engineer lal tak, tunkum maia pension pawh a tel ve avangin kei chuan sawrkar thil rawn sawi hi tawk ka la ti lo a ni.
Chuvangin, mipui mawl zawkte, a bik takin kei hi ka buai ta riau maia, P&E-a thawklai ngei SE pathum leh AE pakhat chu thil nih dan tak leh an mimal ngaihdan min hrilh turin a hran theuhin an office theuhah ka zawt ta a. AE hi chuan a ngaihtuah loh lam a nih avanga ngaihdan sawi theih a neih loh thu a sawi a. SE pathumte min chhan dan chu a inang vek, tunhmaa Engineer dangte min lo chhan thin dan ang tho, ” Tluang takin enkawl (maintain) thei ila chuan kan hlawkpui alawm. Mahse, kan sawrkar sumin a enkawl zo tlat lo alawm” tih a ni vek tho. Chuti a nih chuan tun dinhmunah outsource chu tha i ti em? I mimal ngaihdan min hrilh thei em? tiin ka zawk vek. Anni chuan, ” Tuna kan dinhmun anga, hetia enkawl zawh mang lohva mumal lo taka awmtir leh, hluihlawn mai theih dinhmuna awm ai chuan, a enkawl zo tur hnena hlan mai chu a tha alawm” tiin an mimal ngaihdan min hrilh vek.
Anih leh mi thenkhatin kan la hlawkpui reng alawm tia a hlawkna an rawn chhut chhuak site hi enge a awmzia? P&E Minister khan thawktu hlawhte nena chhut vek chuan a hlawk loh thu leh, midang hnena hlan chuan hnathawktu 100 vel lai chu project thar lama chhawr theih an nih dawn thu a rawn sawi leh si a, a hlawk titute hian thawktu hlawh an chhut tel lo a ni mai lo maw? tia ka zawh chuan, ” A hlawk zawk anga chhut duh tan chuan a chhut theih tho anga, mahse, hlawk zawk anga chhuttute hian chhut kim loh an nei a ni ang. Thawktu hlawh bakah, maintain-na hautak zet hi an chhut tel lo a ni ang. Chubakah, maintain theih loh avanga power siam chhuah theih loh hun tam tak hi an ngaihtuah tel lo a ni thei bawk” an ti hlawm a ni.
Tin, hydel project-te hi siam zawh hlima power unit khat a siam chhuah theihna man senso zat leh a hralhna man zat chhut ngawt hi khuareiah a dik thei lo tih chu a rin theih mai a. Tin, ama thawhchhuah kha amah enkawl leh nan a hman theih ngawt bawk si lova. Sawrkar sum bawmah a lut zel a. A part pakhat pawh chhia se, a leina tur sawrkar atangin chuti maiin a lak chhuah leh ngawt theih si loh tih thu min hrilh theuh.
Tichuan, hman atang leh tuna ka mi kawmte atanga keimaha thil chiang ta em em chu- Hydel Project hi a nih tur ang taka tha taka enkawl zawm pat theih chuan ram tan thil tha tak a ni a, hlawk pawh a hlawk a ni. Mahse, keini state pachhe tak chuan a tha tih hre reng mah ila, kan enkawl that zawh miau loh avangin a enkawl theitu hnena hlan mai chu kan tih theih leh kan tana tha chu a ni tih ka hmu chhuak ta a ni.
Mahse, a enkawlna a hautak si chuan midang hnena hlan ngawt chu ka hlauthawng leh ta hnuhnawh a. Ka mi zawhte hnenah chuan, ‘ Chuti taka enkawl hautak a nih si chuan, midang hnenah kan hlan tawh si anga, kum tam tak, kum 25 lai atan kan lo inziak tang tawh si anga, annin enkawl tha mumal leh si lo ta se, kan va buai duh awm ve le. A tirah agreement siam uluk a va ngai dawn ve le. Agreement siam dan lamte hi min hrilh thei em? Chubakah, hlan chhawn kan tum deuh ber Kundan company-te kha Engineer chawl tawh pakhat khan a sawi nep viau mai bawk si a, sawrkar hi agreement chungchangah hian venpui leh finchhuah ava ngai dawn ve le. Enge i ngaihdan le? ‘ tiin ka zawt hlawm theuh a.
Anni chuan, ” Chulai chu a pawimawhin a hlauhthawnawm khawp mai. Agreement lam chu kan la hre pha ve lova, in duh chuan RTI hmang te pawhin in hre thei ang chu. Tin, Kundan ho hi kan rama an rawn lanna hi a la rei vak lova, hriat thiam a har ka ti” tiin, inveng takin min chhang theuh.
Aw le, chuti a lo nih chuan, kan SHP neih ve chhunte hi hman tangkai dan hre mah ila, kan sumin a tlin miau si loh chuan midang kuta hlan maia, anni hnen atanga hlawk zawka hman tangkai chu kan tih makmawh a lo ni ta si a nih chu.
Amaherawhchu, hemi kawngah hian sawrkar hi hmanhmawh lo sela, fimkhur takin kan hlan chhawn turte chu zirchiang hmasa sela, firm pakhat chauh pawh tinzawn nghal ngur lo bawk sela. Tin, kan inhlan dan tura inremna, agreement pawh chu fimkhur tak leh uluk takin ngaihtuah bawk rawh se. Nakina phengphehlepa khua a tlai hnu hian kan mangang leh si anga, kan inchirhtheh leh luih luih palh ange.
Kau Tlabung Hydel Project man to zetah khan enge maw ti mai maiin hun enge maw chen kha ka va khawsa ve a, hmun danga hydel project kan lo neih tawhte pawh an tangkai lutuk loh bawk nen, tuna ZPM sawrkarin Hydel project thar dang siam an tum leh pawh hi kei chuan ka lo tuipui lem lova. Hemi chungchang hi ka mi kawmte hnenah chuan, ‘ Tuna ZPM sawrkarin hydel project dang siam leh a tum hi tha i ti em? A hma amite ang bawk hian kan hlawkpui lo leh angem? ‘ tiin ka zawt hlawm a. Anni chuan, ” Khuah puitlin theih dawn phawt chuan tha teh reng e. Chubakah, sum hi state tum ve tur pakhatmah a awm lova. Tin, a enkawl dan tur pawh a danglam tawh dawn, P&E deparment-in a remchan dan ang anga enkawl tawh lovin, project enkawl tur bik, Project Monitoring Unit-in an enkawl tawh dawn bawk” tiin min chhang bawk.
A nih leh, hydel project siam thar tur leh, tuna kan neihsa outsource tum chungchang hi mi thenkhat hian, ZPM chu vaiho nena inthuruala sum siam tum mai mai ang dawn dawna an sawi thin hi enge i ngaihdan? tia ka zawh chuan, ” E, chutiang a ni thei lo. Tunlaiah Media leh information a chak tawh a, engkim hailan theih vek a ni tawh a, hetiang thil lian thamah chutiangin tumahin an ti ngam lovang. Bakah, ZPM sawrkar ngat phei chuan chutiang lam hawi chuan a tih duh ka ring lo” an ti a ni.
Aw le, kum hei leh chen kumtluana current neih that lai nei ve ngai reng reng lova buai leh thinur thin Zofate hian, current awm loh lai hreawm zia kha hre rengin, current kan neih ziaawm ve deuhna turah hi chuan sawrkar hmalakna apiang lo tawngpawng dodal nghal zel ringawt lo ila. Khawimaw lai VC leh eng eng inthlan emawa tlin duh vang mai mai hian, kan hmasawnna tluantling leh kan that tlanna tur ti khawlo zawng hian duh duh dan zawng hian rakin khawsa tawh lo ila, kan vaia hmasawnna, thawvenna leh chankanna tur lam thilah hi chuan tanrual leh inlungrual i zir thar ang u hmiang.