Aizawl: December 7, 2025 hi khawvel huapa kristiante ni pawimawh ‘Bible Sunday’ a ni a, Mizoram Baptist Kohhran pawhin he ni hi urhsun takin an hmang.
Mizoram Baptist Kohhran chuan zing inkhawmah Headquarters atanga programme siam angin, Kohhran tinah hun an hmang a. Kumin Bible Sunday thupui atan ‘Pathian Thu Hlu’ (Isaia 40:6-8, IITim 3:6) tih thu hman a ni.
Bible Sunday hi Kristianten an thurin innghahna Bible an neih avanga lawmthu sawina ni atana hman thin a ni a. Amaherawhchu, Mizoramah hian Bible Sunday hi Kohhran hrang hrang lungrual taka an thawhhona Bible Society pualin an hmang ta ber a. Hemi ni thawhlawm pawh hi kohhran tin ten bial kaltlangin Bible Society-ah thehluh a ni thin.
Kohhran pawl inthliarna awm lo vin, hemi ni hian kohhran biak in tam takah Bible Society hruaitute feh chhuakin, Bible Sunday chu Bible Society puala inkhawm nan leh chutiang lam hawia thuchah sawina hun atan hman a ni a. Chu bakah, Bible avanga lawmthu an sawi rualin he rawngbawlna lam hawia infuihna leh mi inpete hnena chawimawina certificate leh lawmman inhlanna ni atan an hmang bawk.