Aizawl: Lai Autonomous District Council (LADC) inthlanpui 2025-a vote tlate chu Thawhlehni hian chhiar a ni dawn a. Vote chhiar tura tih tur ngai leh tulte peih fel a ni tawh.
LADC inthlanpuia Counting Agent leh Election Agent-te chuan Pathianni khan District Election Officer Donny Lalruatsanga kaihhruaiin DC Conference Hall-ah an thukhawm a. Donny Lalruatsanga chuan kalkhawmte hnen a lawmthu sawiin, ralmuang leh tha taka vote thlak zawhfel a nih kawngah party-te thawhpuina fakawm a tih thu a sawi.
Donny Lalruatsanga chuan LADC inthlanpui hmawr bawk thei tep a ni tawh tih sawiin, thahnemngai taka thawhho zel a tul tih a sawi a. Tha tak leh tluang taka vote chhiar a nih theih nan engkim peihfel a ni tawh tih sawiin, a bik takin Counting Agent-te pawh vote chhiar ni-ah an hna tha taka hlen turin a chah bawk.
Pathianni vek khan LADC-MDC inthlanpuia Counting Official te nena thukhawmah Donny Lalruatsanga chuan Lungtian-II a Polling Officer thi ta chungchangah pawi a tih thu leh a chhungte a tawrhpui thu sawiin, ex-gratia pek a nih theih nan theihtawp chhuah a nih thu a sawi.
Ruahman lawk dan chuan LADC inthlanpuia vote tlate hi Thawhlehni hian Govt. Lawngtlai College-ah zing dar 8 atangin chhiar tan a ni ang.
Tar lan tawh angin, LADC inthlanpui 2025 hi December 3, 2025 khan neih niin, vote hi Polling Station 111-ah EVM hmanga thlak a ni a. Vote 56,873 awmin, EVM-a vote tla zawng zawng hi 47,769 a ni a, za zelah 83.99 a tla a ni.
Tun tum LADC inthlanpuiah hian candidate 80 awmin, ZPM chuan bial awm zawng zawng bial 25 an chuh kim a. MNF-in bial 20-ah candidate neiin, Congress-in bial 14-ah candidate an nei a, BJP-in bial 10 candidate neiin, Independent-a chuh mi 11 an awm bawk.