Aizawl: Sorkar laipui hmalakna, Pradhan Mantri Ujjwala Yojana (PMUY) hnuaiah Mizorama chhungkaw khawsak harsa hmeichhiate hnenah a thlawna eirawngbawlna gas connection 36,031 pek chhuah a ni tawh.
Tun hnaia PMUY hmalakna puang zara FCS&CA Sercretary Teresy Vanlalhruaii leh IOC DGM Z. Hlungdim bakah hotu dangten thuthar thehdarhtute an kawmah, PMUY Scheme chu sorkar laipuiin May, 2016 khan bultanin ram chhunga chhungkaw khawsak harsa hmeichhiate hnenah a thlawnin eirawngbawlna gas connection pek thin a nih thu an sawi a. PMUY beihpui thlakna ram chhungah gas connection vaibelchhe 10.33 pek chhuah tawh niin sorkar laipui chuan tun hnaiah connection nuai 25 a pe chhuak leh dawn tih sawiin, heng pek chhuah thar zingah Mizoram atanga a tam thei ang ber an tel theih nan a rang lama inziah luh vat a pawimawh thu an sawi.
PMUY hi Mizoramah connection 36,031 pek chhuah tawh a ni a, heng zingah hian Mamit district-ah tam berin connection 7,462 pek a ni tawh a, Aizawlin dawtin 6,818 pek a ni a, Lungleiah 4,358 leh Kolasib-ah 4,524 pek chhuah niin Lawngtlai district-ah 3,850 pek chhuah a ni a, Champhaiah 2,187, Serchhipah 1,891 leh Hnahthialah 1,825 pek chhuah a ni a, Saitualah 1,225, Khawzawlah 1,051 pek a ni tawh bawk.
PMUY hnuaiah hian chhungkaw khawsak harsa LPG connection la nei ve lote hnenah chhungkuaa hmeichhe kum tling hmingin a thlawna eirawngbawlna gas connection pek chhuah thin a ni a, dil tur chuan LPG distributor-ah emaw, PMUY website emaw, Common Service Centre hnai berah ngaihven theih a ni ang.