Aizawl: Central YMA hruaituten Vairengte leh Sairang inkar kawng siam mek an en a, contractor-te hnathawh mek chu lungawithlak loh thu an sawi.
NHIDCL hnuaia Short Term Maintenance Contract (SMTC) hmanga Vairengte leh Sairang inkar kawngpui siam mek chu Inrinni khan Central YMA hruaituten an enfiah a, contractor-te hnathawh dan chu an duhkhawp loh thu an sawi.
Vairengte leh Sairang inkar kawngpui chu NHIDCL hnuaiah contractor pathumin open tender-a chhangin, kumin July thla atanga thawk tanin, nakkum July-a thawh zawh tur a nih laiin, tun thlengin contractor-te hian an thawh tur zat ve pawh an la thawk lo vek tih Central YMA hruaitute chuan an sawi a, hnathawh dan chu lungawi thlak an tih loh thu an sawi a. NHIDCL hotute leh contractor te chu nakkum fur ruahtui tlak hma ngeia hna zo vek tura an hrilh bakah an hnathawh dan chu an vil zui zel tur thu an hrilh a. Jain Infratech Co. hotute chu Thawhtanni atang hian Sairang lam atanga hnathawk tan ve nghal turin an hrilh bawk.
Central YMA hruaitute chuan kawngpui siam dan hi Krismas hma ngeia tlawh leh an la tum thu an sawi.
Inrinni vek khan Central YMA leh PWD hotuten PMGSY hnuaia Hlimen leh Lungleng inkar kawng siam mek an enfiah a. He kawng siam hnathawk mek tu contractor te hian hna an thawk muang nia hriat a nih avangin an tlawh a, contractor te chu chak zawk a thawk turin an ngen.