Aizawl: Chief Minister Lalduhoma chuan ZPM sorkar tirh phat atangin ruihhlo leh kuhva tawlh ruk titawp tur hma an lak avangin kuminah Mizoram chanchina kuhva rate that ber kum a lo thleng ta tih a sawi.
Rengdil Sports Centre-a Hachhek bial kuhva chingtute leh Land Resources, Soil & Water Conservation department tangkawpin Thawhtannia Kuhva Kût an buatsaih hmanpuitu chief minister chuan ZPM sorkar tirh phat atanga an hmalakna langsar zinga mi chu ruihhlo leh kuhva tawlhruk titawp tura hmalak a ni tih sawiin, “Na takin kan nawr a, kuminah Mizoram chanchina kuhva rate that ber kum a lo thleng ta,” a ti a. Rengdil khua ringawt pawhin cheng nuai sang chuang zet an hralh chu lawmawm a tih thu sawiin, kuhva tawlhruk do hna thawktu police, tlawmngai pawl, magistrate leh an thawhpuite thawhrimnaah lawmthu a sawi.
Soil department chhinchhiah danin tunah hian Mizoramah hectares 30,000 vela zauah kuhva an ching mek tih sawiin Lalduhoma chuan, “Kumina kan thar zawng zawng zat hi kan la hre thei lo va. Nikum khan quintal nuaih hnih vel kan thar. A hralhna a awm that phawt chuan kuhva hian kan ram economy-ah a thawhhlawk tham tawh a ni,” a ti.
Chief minister chuan sorkar laipuiin kuhva huan hi zauh zel tawh loh turin ti mah se kuthnathawktute tan a that avangin Mizoram sorkar chuan kuhva huan tihzauh zel an thlawp a. An flagship scheme Handholding – loan component leh CM Special Package atangin kuhva huan siam theih ve ve a nih thu a sawi a. A hralhna lamah harsatna thleng palh thei a nih avangin a sawngbawlna neih ve chu tha an tiin, tunah hian Buhchangphaiah a sawngbawlna an peih tawh a, NEC sum Rs. Vbc 7.43 hmangin Zamuangah leh Chemphaiah kuhva din mek a nih thu a sawi bawk.
LR,S&WC department Minister Lalthansanga, Kûtpa pawhin thu sawiin, Hachhek bialin tun hmain serthlum an ngah thin a, chumi hnuah teak an ngah leh a, tunah kuhva an ngah leh ta chu mipuite an fingin an taima tih a hriat tih a sawi a. Kuhva hi an tluanpui zel theih nan kuhva smuggling an do rualin a enkawlna kawngah tan an lak a ngai tel a, huan neitute leh department ten theihtawp an chhuah zel dawn tih a sawi.
Kuhva Kût hun khatna hi Er. Vanlalmuanpuia Chhangte, Director, LR,S&WC-in a kaihruai a, Victor MS Dawngliana, Secretary, Kuhva Kût Organising Committee leh Kanan Lalhlimawma, President, Hachhek Bial Kuhva Ching Pawl pawhin thu an sawi a ni.