Aizawl: Union Defence Minister Rajnath Singh-a’n Border Roads Organisation (BRO) hnuaia hmasawnna ruhrel project 125 a hawng a, heng zingah Project Pushpak, Aizawl hnuaia project pathum a tel.
Pathianni khan defence minister chuan D-S-DBO Road, Ladakh-ah online kaltlangin BRO hnuaia hmasawnna ruhrel project 125 a hawng a. Heng project-te hi Lt. Gen. Raghu Srinivasan hnuaia kalpui niin ramri hnaih state leh union territory-a leilung chhengchhe tak kara thiamna sang leh remhriatna hmanga siam kawngpui 28, lei 93 leh a dang pali a tel a. Project Pushpak, Aizawl hnuaia project pathum – Zawlingling-Mawhre-Sapi (Z-M-S) kawng siamna tur, Tuichanglui lei dawhna tur leh Gausan lei te a ni.
Project hrang hrang hawnna hun hi Lok Sabha MP Richard Vanlalhmangaiha leh Rajya Sabha MP K. Vanlalvena leh Chief Engineer, Project Pushpak (GREF) Rajeev Dua-te pawhin an pisa atangin biakhmuhtheih hmangin an chhim a ni.