Aizawl: BJP Mizoram President Dr K Beichhua’n central tha chakna ringa Aizawl Municipal Corporation (AMC)-ah hmasawnna an kalpui theih nan BJP an pawimawh tih a sawi.
BJP Mizoram-in Thawhtannia an party pisa-a Karthar Inhlanna leh Political Session an neihah an president Dr K beichhua chuan, ram tana hma an lakna tur leh mipuite hmasawnna tur atana an tihtum te an tih theihnan inthlanah an tlin a ngai a. Chuvangin, an hmalam hun zelah hma nasa zawka an lak a, mipui an zirtir a, BJP mission an hrilh darh zel a pawimawh tih a sawi.
Siaha bialtu MLA ni bawk Dr K Beichhua chuan, central lamah BJP-in hneh takin sorkarna a siam mek a, mi tam takin BJP hian kum tam tak India ram an kaihruai dawn an ti hial a, Pathian zarah sorkarna hun rei tak an chan pawh a rin thu a sawi a. AMC inthlan an hmachhawn leh mai dawn a, he hunah pawh hian Aizawl khawpui hmasawnna turin BJP chuan theihtawp an chhuah a ngai dawn tih a sawi.
BJP Mizoram President chuan, tun dinhmuna AMC kal danah sum lama harsatna an nei a ni tih hriat theih khawpin hmasawnna hian a thlen tur ang a thleng chak loh avangin, Aizawl khawpuiah sorkar laipui malsawmna an dawn theih nan, AMC-a ding tur mi tha, ram hmangaihtu te, Aizawl khawpui hmasawnna duhtu te ke pen chhuak tur leh party mi te pawh chung ang mi tha zawng a, BJP Candidate atana sawm theuh tura chahin, “Central tha chakna ringa, AMC-ah hmasawnna kan kalpui theih nan BJP te hi kan pawimawh hle a ni,” a ti bawk.