Hornbill Festival vawi 25 hman mek chu a tir ni ruk chhungin chhim mi 1,13,667 an awm hman tih Nagaland sorkarin a puang.
An state chhung mi leh pawn lam mi an kal khawm nasa hle a, ram pawn atanga chhimtu erawh an la tam lutuk lo tih Pathiannia sorkarin a chhinchhiahna a tihchhuahah a tar lang.
Ram dang mi 1,645, state pawn mi 28,637 leh tual chhung mi 83,385-in an chhim tawh a ni.
Inrinni kha tlawhtu an tam ber tum niin mi 22,786 an kal a. Heng zinga 205 hi ram pawn atanga chhimtu niin state pawn lam mi 5,792 leh tual chhung mi 16,789 an ni.
Kût tan niah mi 22,508 chhimtu awm nghalin a ni hniuhnaah 18,010, ni thumnaah 15,324, ni linaah 15,753 leh ni nganaah 19,286 an kal a. A huaihawttute chuan ni 10 awh tur hun an buatsaihah hian tlawhtu an pun zel an beisei thu leh India ram chhung bakah ram pawn lam mi pawh an pun zel an ring.
Pathianni kha Nagaland-a hnam hrang hrang 18-in an hnam thil pho chhuahna hun atan an hmang a. Deputy Chief Minister Yanthungo Patton-a chu kût thlengtu niin sorkar mi pawimawh dangte pawhin an telpui bawk.
Kristian tamna state an nih angin Pathianni khan Advent Christmas atan Nagaland Legislators’ Christian Fellowship leh Nagaland Joint Christian Forum huaihawtin kûtah hian hun hman a ni bawk.