Mohamed Salah awm zel dan tur a chiang rih lo hle a, Arne Slot chuan a zawnin vawi thum chu a chawlhtir tawh a, hei vang hian a chhuah mai ringtu an tam hle.
Egyptian forward hian Anfield a chhuahsan dawn a nih chuan Saudi Pro League club eng emaw zatin lak luh an duh dawn niin thu a thang a. Public Investment Fund-in a thlawp club-ho phei chuan pawisa an neih theih deuh avangin lak an harsat dawn lo niin an sawi.
Salah hi Premier League-a la inkhel mek zingah chuan goal thun hnem ber a ni mek a. Kum 2027 thleng contract a la nei a, tunah hian England-a league sang berah goal 190 a thun tawh.
Season hmasaa Liverpool champion theihna kawnga player pawimawh ber pawl niin, tun season-ah erawh beisei a la pha lo ba. Slot chuan tun hnaia an inkhel hnuhnung pathumah a khelhtir lo a, kum 2024 hnua hetiang thil a tawn hmasak ber niin Salah hi a lawm lo hle.
Kum 2022 atang khan Saudi Pro League club-te chuan pawisa tam tak sengin player langsar an la lut nasa a, tun hnaia an sum hman erawh a tlahniam viau a. Salah ang player lar la lut tur chuan sum theh chhuah an hreh dawn lo.
2034 FIFA World Cup thlen hma ngeiin Saudi Pro League dinhmun chu chawisan an tum hle a, hei vang hian player lar thin, chuai tan tawhte an lak luh nasat phah a. Chutiang atan chuan Salah pawh hi lak luh theih ngei an duh a ni.
Kum 33 mi lak duhtu zingah Simone Inzaghi enkawl Al Hilal chu a langsar ber an ni mek a. Anni hian thil tum fumfe tak neiin pawisa pawh an nei a. Tunah hian Darwin Nunez, Joao Cancelo leh Theo Hernandez te an nei tawh a ni.
Michel Gonzalez enkawl, Al Qadsiah pawh Salah la lut thei tura harsa lo an ni a. Real Madrid defender thin, Nacho kawltute hian Liverpool atanga a chhuak dawn a nih chuan lak ngei an duh ve bawk a ni.
Liverpool captain Virgil van Dijk chuan Salah chu Liverpool thil tuma mi pawimawh berte zingah a la tel tih a sawi ve thung a ni.