Aizawl: MPCC Spokesperson Dr Lallianchhunga chuan kum kum 2028-a ZPM sorkar thlak turin mipuiin MNF aiin Congress an duh zawk tih a sawi.
MPCC-in Congress Bhavan Golden Hall-ah Thawhtanni khan Political Session an hmang a. He huna thusawitu Dr. Lallianchhunga chuan ZPM enchhin sorkar chu Mizorama sorkarna siam tawh zingah mipuiin an nin hma ber sorkar a ni tih a sawi.
Kum 2028 inthlanpuia ZPM thlak tur hian mipuiin MNF aiin Congress an duh zawk tih sawiin MPCC thupuangtu chuan, “A chhan chu, MNF a sorkar leh palh chuan sorkar hnathawkten a hun takah hlawh an la thei lo leh ang a, Mizo Nationalism aiin Kamrul-a contract thawh tur an buaipui leh zawk ang a, politics hmanga Hindu sakhua sawhngheh tumtu Central BJP tha ti chak turin hma an la leh dawn tih Mizoram mipuite hian an hria a ni,” a ti a. Kum 2018-2023 chhung khan an intiamna tihhlawhtlin an nei lo tih sawiin, kum 2028 inthlanpuiah MNF te hian inzawrhna tur engmah an nei tawh lo tih a sawi.
Chief Minister Lalduhoma chungchang sawiin MPCC General Secretary ni bawk Dr Lallianchhunga chuan, “April 2, 2018 khan Mizoram leh HPC-D ten inremna ziakin, kum 20 zet sorkar laka helna chu tihtawp a ni ta a ni. Inremna thuthlung angin Sinlung Hills Council (SHC) pawh din a ni a, remna leh muanna hnuaiah inthlan tum hnih lai buatsaih tawh a ni a. Mipui thlan chhuah ten an huam chhungah hmasawnna an kalpui mek a ni. Hun kal tawha kan hruaitute haw tur zawnga thusawi a ching hi a tha lo takzet a ni,” a ti.