- K. Hmingthankaia
Vawikhat mah zu chungchang ka sawi tawh lovang ka tih hnuah ka sawi zing leh ta hle mai. Tun tuma ka sawi lehna chhan pawh hi, 2025 December thla tir lam khan Ex. MLA pakhat, tuna MNF party-a awm mekin min rawn phone a, ” Tunlaia kawngsir vela eitur zuar, a bik takin zan lama hmun hran hran leh Durtlang chho vela zuar thinte hian zu thenkhat, thlai atanga siam ruih theih an zuar thin niin an sawi a. Hei hi lo ngaihvenin, chanchinbu lamahte lo ziak teh a” a rawn ti a. Keiin, ‘ An zuar fur ang. ZPM sawrkar hian thlai atanga siam phalna leh zawrh phalnate pawh a pe nualin ka hria. Tin, phalna nei lo pawhin, zu chi hrang hrang, Rangvamual zu thlengin zuar an tam ang. Chu’ng chu hriatsa reng alawm. Zu chhe tak tak awmze nei lo leh mumal lo taka zawrh hi kan duh tlat si alawm. Sawrkarin awmze nei leh mumal zawkin, a intu tan chauh ni lo, kan state sawrkar leh mipui tana tha zawk leh hlawk zawka kalpui a tum apianga awmze nei lova lo bengchhenga lo do pawl an inawm chhawk tlat thin alawm. Chuvangin, ka sawi vel peih tawh hleinem. Kan chhiat chhiatin chhe vel mai mai ila, kan nih nih ni vel neinuai mai mai ang, ka lo ti deuh tawh mai asin. Mahse, lo thlithlai ve deuh chu ka tum anga, a tul leh kan ziak leh mai a ni ang chu’ tiin ka chhanga. Ani’n, ” A mak ngawt mai kan awmdan hi. Thil dik zawk hriatsa reng pawh hi pawl hrang hrang leh kohhran pawh hian kan sawibuai lui tlat zela” a ti a. Thil awmdan tur vel chu hriatsa reng a nih avangin ka en thlithlai duh hranpa ta lem hlei lova.
Sawrkarin dan hnuaiah zu tha zawk awmze neia a zawrh that zawk leh that loh zawkna hi chu sawi ngai reng reng lo, nitin zantin thlatin kumtin kan thil hmuh leh hriat atang hian, hnialna tur pakhat pawh awm miah lovin, A THA ZAWK tih hi a chiang em em a ni.
A that zawk avanga khawvel ram hrang hrang leh India ram state zawng zawng deuhthawin an zawrh theih laia engatinge keini state rethei ber hian kan zawrh mumal ve theih tlat loh bik le? Zep nei miah lovin a chhan dik tak ka sawi ang.
Chiangbalin pakhatnaah chuan, ‘Milem’ kan nih vang. Chhut chiang duh lo emaw, chhut chiang peih lo leh thiam lo, mahse, rak tam ve em em site, a thatna leh that lohna chhut thiam vek pawh ni se, midang thil tha tih tum lo sawisel thiam leh lo dang buai thei nih duh hrim kan tam lutuk vang a ni bawk.
Tin, kan ram leh mipui ka hmangaih, tih thu dawt muhlum chiangbala sawi thin political party-te vang a ni chiangbal bawk. Ram leh mipui that zawkna tur lam pakhat mah thlir duh lova, a sawrkar lo zawk apiangin sawrkar lai itsikna vang leh, an lal ve theihna tur a nih dawn phawt chuan, a changin zu zawrh a tha an ti a, a changin zu zawrh a tha lo, ringtu kan ni si eke bale an ti kual thin. Tin, thil dang chu sawiloh, zu zawrh chu sawrkar tan a hlawk dawna, an lo sawrkar ve hunah pawh sawrkar leh mipuiin kan hlawkpui dawn, ramin hma a sawn theih phah dawn tih hre reng mah se, sawrkar laiin a hlawkpui tur bik itsik vang leh paihthlak theihna remchang a nih beiseiin, mipui fuihpawrh nan an hmang thin. Mipui lah mahni lu chunga ek tat tawk leka intifing leh intifel, bum leh fuihpawrh nuam em em kan lo tam si. Chu’ngho chu a mawl pawngpawrh pawrhahte chuan kan la tang leh ta nghala. Kan lu chunga ek min tahsaktute leh kawng dik lo min zawhpuitute lah chu kan hre thei der lova, kan harh mawh si a.
Tun, ZPM sawrkarin zu zawrh an tintuah deuh laia lo au bengchheng ber party pawh kha, a party mi leh sa mi mal zawng ngat phei chuan, zu chhe in leh zu rui tam berna party an ni hial maithei a ni. Social media lamah phei chuan zu chhe rui chung niawm taka mawl tak taka rak vel mai mai hmuh tur an tam hle.
Kohhran kan tihte hi tute dang mah ni lovin, Mizorama khawtin vengtina kan vengchhung theuhva inkawmchhak kawmthlangte vek tho kha kan ni a. Mizoram zim tea Mizo tlemte te hi kan inhre chiang em em vek a ni. Kan ram awmdan, kan rama thil tha lo leh sualna awmte kan hre tlang vek. Thil pawi tak thleng thin leh thleng mekte pawh kan hmu tlang vek. Thil tha zawk leh tih tur tha zawkte pawh kan hre tlang vek bawk. Kan ram dinhmunte, kan khua leh veng dinhmunte, kan chhungkaw dinhmun leh keimahni mimal chhunglam dinhmunte pawh mahni kan inhre vek a ni. Chuvangin, kan rama Setana hna thawhte, kan ram leh mipui tawrhna leh lungngaihna kan tawrhte, kan ram mamawhte pawh hre tlang vek mipui thuhmun reng kan ni. Mahse, kohhran hminga thil tih a nih chuan, kohhran chu mi chungchuang, hmun thianghlima mi thianghlim awmkhawm anga lan mawitir tum tlat kan ni leh si thin.
Engtik lai pawhin sawkarin zu zawrh a tum apianga lo dodaltu langsar ber leh sawrkarin a hlauh ber ni ziah chu, kan ram tithianghlim thei der si lova mi thianghlim ber anga lan tum tlat leh, kan ram chu ram thianghlim ber anga lantir tum leh tlat si thin kohhranhote an ni ziah. Sawrkarin a hlau tih an hriat tlat avangin, thil ti thei inti ru tak leh nuam ti ru tak chungin, mahse, intithupuifun tak leh, intifel famkim niawm takin, nem deuh tak, mahse, puithu hmel deuh tak leh khauh deuh tak anga lang siin sawrkar an lo nawr ve zat thin. Sawrkar lah chuan uluk taka a lo buaipui tawh avanga kan ram tana tha zawk tur a hriatsa reng pawh chu, kohhranho a hlauh der avangin a ti ngam lo leh nge nge thin.
Sawrkar hian kohhran a hlauh chhan hi kohhran chu mi thianghlim awmkhawm anga a ngaih vanga zah ni lovin, politic-a an lalna thuthleng atanga tlak an hlauh vang leh vote hloh an hlauh vang zawk a ni.
Kohhran pawhin zu zawrh chu kan ram leh mipui tan a that zawk leh that loh zawk lam aiin, ‘zu’ tih hming a nih tak vang hrim hrima lo dodal chu kohhran tih tur niawm tlata an ngaih vang ni berin a lang bawk.
Pawl hrang hrang leh political party dangte pawhin a that leh that loh lam aiin, an pawl tihlar leh boruak siam nan, sawrkar lai thil tum lo tibuai thei nih duh vang mai mai tih hai rual a ni hek lo.
Chuti chuan, chutiang chu kan ram awmdan dik tak leh kan zavaia awmdan dik tak chu a lo ni taa. Chuti chuan, chutiang kan nih avang chuan vawiina kan ram dinhmun dik tak chu heti hi a lo ni taa. Chuti chuan, state rethei ber, drug addict tamna ber, aid vei tamna ber, cancer vei tamna ber, corruption chu nunphung pangngai emaw tihna ram, zu in leh zu zuar awm lohna ram thianghlim, mahse, zu chhe lutuk, zu pawh ni pha tawh lo, ‘Tur’ ni zawk awm tak in thin leh zuar thin tam em emna, mipa thalai thi tamna state kan lo ni ta zawk a nih hi. Chuti chuan, chutiang chu kan nih avangin kei pawhin, zu chungchang sawi fo hi awmze nei lo leh tul lo ka lo tih phah hial tawh a nih kha.
Chuti chuan, khitiang zawng zawng tuartute chu, he Mizoram chhunga kohhran leh pawl hrang hrang leh party hrang hranga awmhote, kan zavaia Mizoram zimtea Mizo tlemte te tho hi kan ni si a.
He leia mihring awmna apiangah chuan zu hi a awm zel a. Khawvel awm chhung chu a awm zel bawk ang. Hnam mawl leh mi mawl engang pawhin an chenna hmun azir zelin anmahni tawkin siam dan an thiam zel a. Hnam changkangin an siam changkangin an in changkang a ni mai. Keini phei chu kan intih changkan tehlul nen, tu tih hriat mang lohten tawp tak taka zu chhia, zu lem, tur ni zawk awm tak an siam in mai mai tur kan ni hleinem. Khualzin, Tourist-ten, ‘ Khawnge in tualchhung zu ka lo in ve teh ang’ an tih hunah eng zu nge i kawhhmuh ang le? Kan tualchhung zu, kan Mizo zu tha takte kha promote thar leh a hun tawh lutuk.
Kohhran pawhin zu chungchanga aw lo neih ve talh hi tum tawh loh ni se, kohhran pangngai chuan englai mahin zu chu a sawi mawi dawn lo. Kohhran pangngai huang chhungah chuan entikah mah zu hi lakluh a ni ngai bawk hek lo ang. Chuvangin, kohhran huang pawnlam thil zu chungchangah hi chuan kohhran hian, aw leh aih tih pawh ngai lovin lo ngawi tawh zawk mai rawh se.
Chuvangin, kan hriat tlansa reng, kan ram leh mipui mihring tana tha zawk, kan sawrkar tana hlawk zawk tur ni bawk, mahse, tunah chuan kan chhiat phah tual tualna leh mi min nuihzatna mai mai ni mek zu chungchangah hian, tun atang chuan tumahin lem i chang tawh lo ang u. Thu dik tak, thil dik tak leh thil awmdan dik tak chu kan vaiin kan hre ru kur tho si a.