- Dr. C. Lalrampana
Nigeria ram sawi tawh chuan rilru hi a rumin a na vawng vawng thin. Nigeria rama kan Kristian-pui unau duhawm tak tak, tuma pawi sawi si lo, hlim taka Pathian faka Biak ina an inkhawm lai leh mahni hna tul thawk lai, dimna nei miah lova a râwng thei ang bera ISIS-ho leh hel pawl chihrang hrangte’n an han that hmiah hmiah mai thin hi chu rilru a nain tawrh thiam a har takzet thin a ni.
Nigeria rama kan unau Kristiante hian buaina namen lo an tãwk tawh a, an tâwk mek bawk a, an la tâwkleh zel dawn bawk niin a lang. An va’n lainatawm tehlul êm! Kum 2025 chhung khan Kristian 7,087 lai thah an ni tawh a, hei hi nitin mi 32 zel thah ang an ni. Heng thil thleng hi jihadist pawl 22 velin intiam ruala beihpui an thlak vang a ni. A va han rapthlak tehlul êm!
Hei bakah hian kohhran biak in 19,100 chuang tih chhiat a ni tawh a, Kristiante chenna hmun 1,100 chuang chhuahsan tura tih an ni tawh bawk. Kristiante zingah puithiam leh pastor 600 chuang man an ni tawh a, an zinga 250 hi Catholic puithiam an ni a, 350 hi pastor an ni. Inter-Society data report-in a tarlan danin kum 2009 atang khan Nigeria-ah hian mi 185,009 thah an ni tawh a, heng zingah hian Kristian 125,009 leh Muslim firfiak ve lo [liberal Muslim] 60,000 an tel a. August 19, 2025 thleng khan mi 7,899 rukbo an ni tawh bawk.
Nigeria-a firfiak pawl hrang hrang, rawng taka che thinte hi-Boko Haram: Kum 2002-a din, Nigeria hmar lama buaina tam tak thlen tawhtu te, Islamic State West Africa Province (ISWAP): Boko Haram atanga peng chhuak, kum 2016-a din niin, ram chhungah beihpui thlakna tam tak nei tawhte an ni.
US President Donald Trump chuan kristiante a lainat êm avangin December 24 & 25, 2025 khan Nigeria hmarchhak lamah Islamic State pawl lakah beihpui thlakna neiin a che chhuak ta riap mai! Donald Trump hian Kristiante thah an nih fo avangin beihpui thlak a ni tih a sawi zui bawk.
Hetianga rawng taka hel pawlho hma lakna hi Human rights pawl hrang hrangte chuan an dem hle a, Nigeria ram hi US-in ram ngaihven ngai zual bik takah dah turin an phut a, Kristiante chunga thil thleng mek hi chinfel vat a ngai tih an sawi bawk.
Tichuan, US leh Nigeria chuan December 25, 2025 khan Islamic State (IS) Hel pawlte laka beihpui thlakna an nei a, hei hi Nigeria sorkar ngenna a ni. US President Donald Trump chuan a thuchhuahah, “Vawiina ka hmalakna atan, United States chuan Northwest Nigeria-a ISIS Terrorist Scum te lakah beihpui thlakna neiin, an thil tum ber chu Kristiante thah chiam chiamna tihtawp a ni,” a ti chheu chheu mai. Sokoto State, Nigeria-ah beihpui thlak a ni a, IS militants-te camp an bei riap riap mai! Nigeria sorkar chuan he beihpui thlakna hi an thlawp tlat a, “structured security cooperation” an neih tawhna a ni an ti. US Africa Command (AFRICOM) chuan IS helpawl [militants] tam tak an thi niin an sawi.
Nigeria sorkar chuan US nena an thawh dunna chu lawmawm an tih thu an sawi a, hel dona kawngah thawh dun zel an tum bawk. US chuan Nigeria-a Kristiante chungchangah ngaihtuahna thuk tak an neih thu a sawi a, Nigeria sorkar erawh chuan eng sakhua mah an thlawp loh thu an sawi. Kogi state-ah chuan inkhawm lai mi 13 chu mi sualten ralthuam nen an ru bo leh a, mi 5 an thi niin thuneitute chuan an sawi. Heng bakah hian Nigeria ramah hian Kristian tam tak an thi tawh a, firfiak pawlte hian Kristian te an thah chiam chiam vangin ram chhungah buaina a thleng nasa hle a ni.
Khawvelah Kristian sawrkar tenau 11, Kristian sawrkar lian zual 8 leh Kristian punchakna ram 5 a awm a. Heng zing atang hian US chiah hian Nigeria rama Kristian tihduhdahna hi ngaimawhin an thlavang a hauh ngam a ni.
Barack Obama presidency [2009-2017] leh Joe Baiden presidency [2021-2026] laia USA-a sualna uchuak tak tak leh, neih inang inkawp leh nawhchizawrhna Thil tentawm tak leh tualchhunga tharum thawhna chhuak fo thinte kha President Donald Trump chuan huaisen takin a tudawlin a thian fai vek a, tunah chuan US boruak pawh a ziaawm huai tawh niin a lang.
Nigeria-a Kristiante chunga hleilenna thleng mek pawh hi Donald Trump chuan huaisen takin ISIS-ho bupui chu a bomb ta hmiah hmiah mai a, reiloteah a tudawl vek theiin a rinawm. Hetianga President Trump-a’n dim baksak lova hel pawl tudawl tura a beihna turu tak hi abik takin Nigeria rama tihduhdah mek kan unau kristiante tan chuan engthawlna thlentu malsawmna ropui tak a va ni chiang êm! Chuvangin, kristian tawh phawt chuan Nigeria rama US beihpuithlakna hi a hlawhtlin chhoh zel theih nan leh kan unau kristiante’n zalenna an hmuh ngei theih nan theihtawp chhuahin Pathian hnenah I tawngtaipui fan fan ang u. Lalpa Nigeria rama nangmah ringtute tawrhna zozai hi a tawk tawh e, khawngaih takin Lalpa an dinhmun derthawng tak lak ata hi han chhanchhuak lul teh.