Infiamna ngainatute tan kum 2026 hi kum duhawm tak tiin a sawi theih dawn a, kumin chhungin infiamna chi hrang hrang kaihhnawih intihsiakna lian tham tak a awm nual dawn a ni.
Kumin chhunga infiamna lian tham deuh hlek zingah FIFA World Cup chu a langsar ber tura ngaih a ni a, hei bakah hian T20 World Cup pawh a awm dawn bawk.
FIFA World Cup hi USA, Canada leh Mexico ten an inthlen tawm dawn a. Cricket ngainatute tan mipa leh hmeichhe pualin T20 World Cup a awm ve ve dawn a. U-19 World Cup pawh Zimbabwe leh Namibia-ah buatsaih a ni dawn a, hetah hian India pawhin team a tir ang.
Tennis huangah pawh Grand Slam pali a awm leh ngei dawn a, Formula One season thar nghahhlelhawm tak nghah chhuah tur a awm dawn a. Netherlands leh Belgium-ah hockey World Cup a awm ang a, India mipa team pawhin champion ngei an tum dawn a. Heng bakah hian Commonwealth Games leh Asian Games a la awm dawn cheu a ni.
Chess inelna ropui, FIDE Candidates tournament buatsaih a nih dawn bakah World Chess Championship 2026 a awm ang a, hetah hian D Gukesh chuan a title kawl lai humhim a tum ang.
January 9 atanga February 5 chhungin Vadodara leh Navi Mumbai-ah Women’s Premier League cricket inelna a awm mek a. January 15 atanga February 6 chhungin Zimbabwe leh Namibia-ah ICC Men’s Under-19 World Cup a awm ang.
February 7 leh March 8 inkarah India leh Sri Lanka-ah ICC Men’s T20 World Cup khelh a ni dawn a, Indian Premier League (IPL) pawh March thla tawp lam atanga May thla tawp lam thlengin India ram chhunga neih a ni dawn bawk a. ICC Women’s T20 World Cup chu June 12 leh July 5 chhungin England rama khelh a ni dawn.
January thla laihawl atanga February thla laihawlah Melbourne, Australia-ah Australian Open an khel ang a. May thla tawp lam atanga June thla tir lampang thlengin Paris khawpuiah French Open khelh a ni dawn a. London khawpuiah June thla tawp atanga July thla laihawl thlengin Wimbledon Championships an khel ang a, August thla tawp lam atanga September thla tir hian New York khawpuiah US Open an khel ve leh dawn bawk a ni.
November 7 atanga 14 chhungin Riyadh, Saudi Arabia-ah WTA Finals an khel dawn a, November 24 atanga 29 chhungin Bologna, Italy-ah Davis Cup Finals an khel dawn a. December 15 atanga 22 chhungin Jeddah, Saudi Arabia ah ATP Finals khelh a ni bawk ang.
June 11 atanga July 19 chhungin USA, Canada leh Mexico-ah FIFA World Cup khelh a ni ang a, July 19-ah New Jersey khawpuiah final an khel dawn.
Europe lamah UEFA Champions League final chu May 30-ah Budapest, Hungary-ah an khel ang.
Badminton inelna lian BWF World Championships chu August thla tawp lam atanga September thla tir thlengin New Delhi-ah khelh a ni dawn a. BWF World Tour Finals chu December 9 atanga 13 chhungin Hangzhou, China-a neih tur a ni.
FIH Hockey World Cup chu Netherlands leh Belgium-ah August 14 atanga 30 chhungin an nei dawn a. NBA Finals chu June 4 atangin USA-ah khelh a ni dawn a, FIBA Women’s World Cup chu Berlin khawpuiah September 4 atanga 13 chhungin an nei ang.
FIDE Candidates Tournament chu March 28 atanga April 16 chhungin Cyprus khawpuia neih a ni dawn a, World Chess Championship 2026 pawh neih a ni dawn bawk a ni.
Formula 1 season thar chu March 8 atanga tan a ni dawn a, Melbourne-ah Australian Grand Prix a awm dawn a. Season kharna chu December 4 atanga 6 chhungin Abu Dhabi-ah neih a ni ang.
Golf inelna lian, The Masters chu April 9 atanga 12 chhungin Augusta, Georgia, USA-ah khelh a ni dawn a. The Open Championship chu Royal Liverpool (Hoylake), England-ah July thla laihawla neih a ni dawn a ni.
Thirsakawr intlansiakna ropui ber tia sawi, Tour de France chu July 4 atanga 26 chhungin France-ah tlan a ni ang a. Pune khawpuiah January 19 atanga 23 chhungin Pune Grand tour an nei dawn bawk a ni.
World Baseball Classic chu March 5 atanga 17 chhunga neih a ni ang a, MLB season pawh March 26 atangin an tan dawn a, October 23 atangin MLB World Series neih tan a ni bawk ang.
Winter Olympics chu February 6 atanga 22 chhungin Milan-Cortina, Italy-ah neih a ni dawn a. Hei bakah hian Commonwealth Games pawh July 23 atanga August 2 chhungin Glasgow, Scotland-ah neih a ni dawn bawk a ni.
Asian Games chu September 19 atanga October 4 thlengin Aichi-Nagoya, Japan-ah neih a ni ang a. WWE Royal Rumble chu January 31-ah hian Riyadh, Saudi Arabia-ah neih a ni dawn a. February 28-ah hian Chicago khawpuiah WWE Elimination Chamber an nei ang a, WWE WrestleMania 42 chu April 18-ah khian Las Vegas, USA-ah neih a ni dawn a ni.
WWE SummerSlam pawh August 1 leh 2-ah Minneapolis, USA-ah an nei ang a, WWE Money in the Bank chu September 6-ah New Orleans, USA a neih a ni ang.