Aizawl: MJA General Headquarters chuan nimin khan kum thar, 2026 atana inhlanna tharna neih pahin thingpui an inho.
Aizawl Press Club-a inkhawmah hian MJA General Headquarters President C. Lalrambuatsaiha chuan Mizoram hmun hrang hranga MJA member-te kum thar chibai bukin duhsakna a hlan a. MJA member zingah pawl thiltih leh hmalakna ngai pawimawh tawk lo an awm thin chu tha lo a tih thu a sawi a, member-te chu pawl hmalakna ngai pawmawh thar a, mi dang tih turah dah mai lova a theih chin chinah tel ve tum thin turin a chah.
C. Lalrambuatsaiha chuan journalist-te chu hnathawh hunbi pawh bei lova a remchan ang anga khawsak chang an ngah avangin an hriselna ngai pawimawh turin a chah a. A bikin an MJA member zingah zu kaihhnawih natna avanga harsatna tawk an awm leh thin chu thil pawi tak a nih avangin an hriselna ngai pawimawh chunga mahni inthunun tum deuh deuh turin a chah a ni.
Inkhawm hi MJA Vice President C. Lalhmachhuana’n a kaihruai a. General Secretary K. Zothanpara’n kum kal taa MJA chetvelna report a pe a, K. Lalhruaitluanga’n hunserh a hmang a ni.