Chief Minister Lalduhoma chuan nimina Sairang Horticulture Centre-a Mizoram Agricultural Marketing Board (MAMB)-in Bana kaih (Handholding) Scheme hnuaia a din, Ginger Processing Unit a hawnnaah February 2 atangin an lei tan dawn tih a sawi a, sapthei pawh larpui thama ngah an tum leh dawn tih a sawi.
Chief minister chuan kum tam tak chhung an vei tawh a takin a chang mek chu lawmawm a tih thu a sawi a, processing unit dinna kawnga mawhphurtu, MAMB leh horticulture department chungah lawmthu a sawi.
“UT kan atangin kum 54 vel a ni tawh a, lo neia eizawng tamna ram ni chungin eng thlai mah hi kan la hmingthanpui ngai lo. Tunah chuan Mizoram chu Ginger Capital of India tia hriat kan ni chho tan ta,” a ti a. Sapthei pawh nasa taka kalpui a thaa hriaiin larpui thama ngah an tum leh dawn tih a sawi.
Sawhthing vangin chhungkaw tam takin sum an lalut a, mipuiten pawisa an neih avangin sumdawngte tan a hlawk a, kohhran thawhlawm chenin a pung niin a sawi.
Sawhthing hi February 2 atangin lei tan leh a ni dawn tih sawiin, “Mizo kutchhuak, a zailepna khawl leh a tihrona khawl eng emaw zat collection centre-a daha an lo hman theiha chhawpsak kan rilruk mek a. Chu chuan sawhthing process-na kawngah min pui nasa hlein kan ring,” a ti.
Chief minister-in a hawn tak hi an sorkara a process-na hmasa ber a ni a, a hmunhmain a zawh tho avangin tihlen thaa a rin thu a sawi a, “A tul angin tihlen kan tum ang. A pawimawh ber erawh chu a enkawltu tura thlan, Good Faith te an ni a, an kutah hian a hlawhtlin leh hlawhtlin loh a innghat thui hle a ni,” a ti.
Khuanglengah processing unit dang an din mek thu leh a enkawltu turin tawnhriat nei tha, Opickpure an thlang a. Chhingchhipa khawl hluite an tuai thar tawh bawk tih a sawi.
Khualzahawm C. Lalsawivunga leh Dr. KC Lalmalsawmzauva, Adviser to CM, Handholding te pawhin thusawina an nei a ni.
MAMB chuan Sairanga Horticulture Centre hmun hma leh building thenkhatte chu private company hnenah sawhthing process nan outsource turin October 17, 2024 khan Expression of Interest (EOI) a chhuah a. A chhangtute zing atang hian Good Faith, Saron Veng chu thlan an ni.
An hnenah hian MAMB chuan horticulture centre-a heng building, Transit Godown, Integrated pack house, Manager quarters leh Chowkidar quarters te hi MoU ziakin kum nga chhung atan January 13, 2025 khan a hlan.
Good Faith hian kum 2025 atang khan ginger processing leh marketing an kalpui mek laiin MAMB hian horticulture centre-a transit godown-ah hian Rs. nuai 71 sengin ginger processing line (khawl) a bun leh ta a. Heu hi Good Faith enkawl tura tih a nih angin MAMB leh Good Faith hian MoU an ziak nghal.
Hawnna inkhawm hi Ramdinliani, Secretary, Agriculture & Farmers’ Welfare chuan a kaihruai a, Dr. David Fangzauva, Deputy Manager, MAMB-in technical report a pe a, sum ruahman Rs. nuai 71 atangin Rs. nuai 61 an hmang tawh a, hmabak tlem an la nei tih a sawi.
He hunah hian bialtu MLA TBC Lalvenchhunga, Adviser to CM leh Lalchhuanthanga, MLA leh sorkar mi pawimawhte an tel.