India rama hmeichhe footballer-ten hma an sawn viau a, ram chhung mai pawh ni tawh loin, ram pawnah pawh an khel chhuak tan tawh a. Tunah pawh hian mi eng emaw zat chu ram pawnah inkhelin an awm mek a ni.
Ram pawn lama inkhel thei zinga langsar zual panga han thur chhuak ila.
- Rivka Ramji: Karnataka football huangah chuan a khel kual ve nual hman a. Midfielder kum 19 mi hi Karnataka aiawh pawhin a che tha viau a, Indian Women’s League club Sethu WFC-ah a lut zui a. India U20 team leh IWL-ah a chet that avangin kum 2025 khan Singapore club Lion City Sailors hmeichhe team-in an la lut a ni.
- Kajol D’Souza: La Liga football school chhuak niin IWL club Sethu WFC leh Odisha WFC-ah te a khel thin a. FIFA U17 Women’s World Cup-ah pawh India U17 team-ah a tel tawh a, India hmeichhe team-ah a khel tawh a, vawi hnih inlanah goal thum a thun tawh nghe nghe a. Kum 2025 nipui lai khan Saudi Arabia club Al-Amal chuan an la lut a, midfielder tha tak hi Saudi Women’s First Division-ah pawh a che tha hle a, 2025-26 season khan vawi inkhelhah goal nga a thun thei a ni.
- Aveka Singh: University of California-ah business economics a zir laiin America-a college football team UC Irvine Anteaters-ah tawnhriat a nei chho a, India rama a let leh hnuah pawh ram pawna khelh zui a duh a. India U17 team tan vawi 11 khelin goal nga a thun tawh a, Denmark-a hmeichhe division sang ber club Naestved HG chu kum 2025 khan a zawm a, a khelh hmasak berah goal a thun nghal nghe nghe.
- Harshika Jain: Gokulam Kerala FC forward hlui hian Europe khawmualpuia khelh theih ngei a tum hle a. Gokulam Kerala FC chu Indian Women’s League nomawi a lakpui hman a, Romania-a division sang ber club, ACS Atletic Olimpia Gherla a zawm tawh a. Indian footballer zingah chuan Romania-a khel thei hmasa ber niin tunah hian an club player pawimawh berte zingah a tel mek a ni.
- Manisha Kalyan: Vawi eng emaw zat AIFF Women’s Player of the Year pawh lo ni tawh niin, Manisha hian Gokulam Kerala FC chu IWL nomawi vawi hnih a lakpui tawh a. India hmeichhe team tan vawi 48 a feh chhuak tawh a, hengah hian goal 14 chu a thun tawh a. Kum 2024 khan Greek club PAOK hmeichhe team a zawm a, India hmeichhe zinga Greece rama football khel hmasa ber a nih bakah Indian footballer zinga UEFA Women’s Champions League khel hmasa ber a ni bawk a. 2024-25 season ah khan PAOK tan Manisha chuan goal 8 a thun bakah mi goal thun tur vawi 5 a siamsak bawk a ni.