Aizawl: Loch House (Gajraj Hall), Aizawla Sainik Welfare & Settlement Department bultumin 10th Armed Forces Veteran Day cum Ex- Services Reunion of Mizoram hman chu Chief Minister Lalduhoma’n a hmanpui.
Chief minister chuan India zalenna sualnaah te, Indopui II-naa India venhimnaah te, zalenna hmuh hnua indona hrang hrangah Mizoten an thawhhlawk ve hle a. Mizo thalai India sipaia tangte hi an awmna hmun apiangah fak an hlawh thin tih a sawi a. Ram venhim nana vanglai hun tha hmangral tawhte bula Armed Forces Veteran Day a tel chu nuam a tiin ram tana an inpeknateah lawmthu a sawi a, nunna hlantu zawng zawngte zahna chibai a buk bawk.
Sorkarin thalai a tam thei ang ber sipaiah lut se a duh a, hma an la tih a sawi a, Territorial Army an din bawk tih a sawi a. Mizoram sorkarin veterans te tana hamthatna a buaipui hrang hrangte a tar lang bawk.
Chief minister hian tangka kum kaltaah khan kum 65 chung lam, sipai bang pension la ve lote tan sorkarin Penury Grant Rs. nuai 49.44 a dil chhuak a, sipai bang fate scholarship tur Rs. nuai 47.4 dil chhuah a ni a, sipai nupui hmeithaite inzirna atan Rs. nuai 2.5 leh sipai bang fanute pasal neih tanpui nan Rs. nuai 4 pek chhuah a ni tih a sawi.
Tangka kum kal mekah sipai huaisen chawimawina dawngte lawmpui nan Rs. nuai 16 pek a ni a. Ex- Servicemen Contributory Health Scheme hnuaiah a thlawna inenkawlna hmun atan ZMC&H leh Zemabawk Cancer Hospital chu dah thar a ni a, sorkar hna laknaah 5% hauhsak an ni a. Tunah hian Mizoramah Ex-Servicemen 6170 leh hmeithai mi 2,483 an awm a. Central sorkar atanga hamthatna an dawn hi kum khatah Rs. vaibelchhe 180 vel a tling thin.
Thu a sawi zawh hian Chief Minister hian lawmman chi hrang hrang a sem nghal a. An zingah India sipai huaisen chawimawina sang ber pahnihna, Kirti Chakra dawngtu, Captain Lalrinawma Sailo a tel a. Ani hi Mizo zinga Kirti Chakra dawng thei pahnihna niin Mizoram sorkar chuan lawmpuina Rs. nuai 10 a pe.
K. Sapdanga, Home Minister pawhin thu a sawi bawk a, ram tana an inpekna hlu a ti a, an zahin an chawimawi tih a sawi.
Armed Forces Veteran Day hi India pumah kum 2017 atang khan hman tan niin January 14-ah hman thin a ni a. He ni hi First Commander-in-Chief of the Armed Forces, Field Marshal KM Cariappa OBE, kum 1953-a pension-a a chhuah ni a ni.