Aizawl: Mizo National Front chuan March 1, 1966-a zalenna puang a, Mizoramin zalenna famkim a neihna tura a beihna champha kum 60 na chu kumin March 1 hian an lawm dawn a. Hemi ni hi Pathianni a nih avangin a lawmna hun March 2, 2026 hian Vanapa Hall-ah an hmang dawn.
Hemi atana Celebration Committee a din, MNF Sr. Vice President Dr. R. Lalthangliana kaihhruai chu Thawhlehni khan Mizo Hnam Runah a tum hnih nan thukhawmin ruahmanna hrang hrang an siam.
Sub Committee-te hmalak tawhna leh ruahmanna an siam mek report an ngaithla a. Mizoram Independence puan Diamond Jubilee hi March 1, 2026-ah a lawmna hawnna neih a ni ang a, kumtluana programme hrang hrang neih tum niin a kharna hun hi March 1, 2027-ah neih tum a ni.
Kum khat chhung kum tluana lawmna thupui atan, ‘Zalenna sang ber neih hi Mizote chanvo a ni’ tih chu hman a ni ang.
A lawmna hunpui ber hi Aizawl-ah neih a ni ang a, hemi bakah hian MNF Sub Headquarters, District Headquarters, Block hrang hrangah te a remchan dan anga hman tura ruahman a ni bawk.
Hemi hriatrengna Lungphun Mizo Hnam Run sira phun chu March 1, 2026 hian hawn tura buatsaih mek a ni a. MNF President Zoramthanga’n a hawng ang.