Jammu & Kashmir-a Keri sector, Doonga Gali-a Line of Control (LoC) hrulah drone eng emaw zat hmuh leh a ni a, venhim hna thawktute an inringin an che chhuak nghal sung sung.
Sipaite chuan drone-te hi an thlithlai zui nghal a, kah thlak tumin silai pawh an hmet puak a, kah thlak emaw, thil thlak emaw an nei em tih pawh an nei em tih an dap zui nghal bawk.
Tun hi darkar 48 lek chhungin Rajouri sector-a drone tam tak an thlawh vawi hnihna a ni ta a, LoC leh International Border (IB)-ah nasa taka inralrin thar phah a ni a. Venhimna tihkhauh leh tihchak thar a ni a, sipaite pawh inralring lehzuala awmtir nghal an ni.
Nikum May thlaa Operation Sindoor kalpui a nih hnuah tun hi ni rei lo te chhunga LoC leh IB hrula drone thahnem tak hmuh a nih leh vawi khatna a ni.
Pathianni khan Rajouri-ah hian drone eng emaw zat hmuh a lo ni tawh a, pakhat chu minute rei vak lo chhung Chak Babral khua, Ramgarh sector, Samba-ah a dir char char nghe nghe.
A hmain Nowshera, Poonch leh Samba sector-ah pawh drone hi hmuh a lo ni tawh a, ralthuam leh puak thei dang thlak tum nia ngaih an ni a. Kar hmasa khan Samba sector-ah hian pistol, magazine leh puak thei dang tam tak chhar a ni a, Pakistan-in India-a ruihhlo leh ralthuam tawlh luh a tumna pakhat ni ngeia ngaih a ni.
Thawhlehni khan Army chief General Upendra Dwivedi-a chuan Pakistan hi vauin tih tur tul lo chin an ti a nih chuan an chhan let tur thu a sawi a. Operation Sindoor-a an hlawhtlinna sawi chhuakin Pahalgam-a mi firfiakte chetna phuba lain Pakistan-a firfiak awmna hmun tam tak an chhu chhia a, beihpui hi an la thlak chhunzawm reng tih a sawi.