Aizawl: District Council & Minority Affairs Minister C. Lalsawivunga chuan nimin khan Mizoram Secretariat Conference Hall, MINECO-ah Mizoram State Sports Council (MSSC) buatsaih, Lunglei, Lawngtlai leh Mamit District-a Ministry of Minority Affairs hnuaia Pradhan Mantri Jan Vikas Karyakram (PMJVK) kaltlanga basketball court 24 leh volleyball court 18 sakte a hawng.
C. Lalsawivunga chuan MSSC hmalakna hnuaia PMJVK sum hmanga infiamna hmunhma 42 hawn a ni thei chu lawmawm a tih thu a sawi a. Kum 2036-a India-in Olympic a thlen tura Mizoram aiawha infiammite an tel theih a beisei thu leh hemi tihhlawhtlin nana minister hova ruahmanna tha tak neia hna an thawk chu lawmawm a tih thu a sawi.
Infiamna hmunhma hawnnaah hian MSSC leh PMJVK (PMU)-a thawkte an tel a. Pu Henry C. Lalrawnkima, Secretary, MSSC-in hun kaihruaiin James Lalramnghaka, Assistant Engineer, MSSC chuan a hnuaia tarlan ang hian technical report a pe bawk.
Kum 2020-21 khan Ministry of Minority Affairs hnuaia PMJVK Scheme atangin basketball court with viewing gallery leh volleyball court with viewing gallery siamna atan approval hmuh a ni a. March 22, 2022 khan expenditure sanction hmuh niin heng hnate hi district pathum – Lunglei, Lawngtlai leh Mamit District-ah thawh a ni a. Tender chhuah hnuah a thawk tur hian M/s Junior Consultancy Services, Tlangnuam, Aizawl, Mizoram chu thlan a ni.
Lunglei district-ah Basketball Court with Viewing Gallery siam nan Rs. nuai 107.11 hmuh Buarpui leh Lunglawn, Lungleiah siam a ni.
Volleyball court with Viewing Gallery siam nan Rs. nuai 32.58 hmuh a ni a, Lungleia College Veng leh Theiriatah siam a ni.
Lawngtlai district-ah Basketball Court with Viewing Gallery siam nan Rs. nuai 108.07 hmuh a ni a, Chawngte P, Chawnhu, Diltang, Paithar leh Mampuiah siam a ni.
Volleyball court with Viewing Gallery siam nan hian Rs. nuai 32.87 hmuh a ni a, Chawnhu, Diltlang, Paithar leh Chawngte C-ah siam a ni.
Mamit district-ah Basketball Court with Viewing Gallery siam nan Rs. nuai 102.59 hmuh a ni a, Zamuang, Bungthuam, Lallen, New West Phaileng, Phuldungsel, Saithah, West Phaileng, Borai, Kanhmun, Kawrtethawveng, DSC, Mamit, Rengdil, Zawinuam College, Zomuantlang, Zampui Phuldungsei, Mamit leh Darlakah siam a ni.
Volleyball court with Viewing Gallery siam nan hian Rs. nuai 31.20 hmuh a ni a. Marpara North, Saikhawthlir, Chhippui, Parvatui, Phuldungsei, Saithah, Pukzing, West Phaileng, Borai, Rengdil, Zomuantlang leh Zampui Phuldungseiah siam a ni.