Chhiatrupna thlen thulha chhanchhuah leh chhawmdawl hna kalpui dan tur, a taka enchhinna, State Level Mock Exercise on Earthquake chu National Disaster Management Authority leh Disaster Management & Rehabilitation Department bultumin Mizoram district tinah kalpui a ni.
State Level Mock Exercise on Earthquake hi chawhma dar 10 atang khan tih chhinna hi kalpui tan a ni a. District tin a Quick Response Force-te, Fire & Emergency services -te, National Disaster Response Force, State Disaster Response Force, Assam leh Tripura atangin Central Industrial Security Force (CISF), Assam Rifles, Border Security Force (BSF), Medical team, tlawmngai pawl leh volunteer-te mawhphurhna ataka an kalpui dan enchhin a ni.
Lirnghing vanga in chim, kangmei chhuak, kawng ping, inbiakpawhna chhia thleng thei kara chhanchhuah leh chhawmdawl hna awmze nei taka kalpui dan tih chhinnaah hian line department hrang hrang – PHE, PWD, P&E, transport, I&PR leh a dangte pawh an tel a. Hliam enkawlna hmun, relief camp-te hi NDMA leh DM&R hotute hian an tlawh bawk.
Khaw thim hnua chhanchhuah leh chhawmdawl hna kalpui kawngah harsatna a awm leh awm loh hriat a nih theih nan State Level Mock Exercise hi tlai dar 5:00-ah kalpui leh a ni bawk.
Lirnghing avanga inchim, kangmei chhuak leh chhiatna hrang hrang thlen theih dan lem chan hi district hrang hranga hmun 36-ah chan a ni a. Heng hmunahte hian District Emergency Operation Centre-te, Incident Site Commander-te, Staging Area Management leh Relief Camp-a hmalaknate chu Video Conference kaltlangin vilpui a ni a. Brig. Ravinder Gurung (Retd.) Sr. Consultant, NDMA chuan State Emergency Operation Centre atangin heng chetlaknate hi thlirpuiin PC Lallawmsanga, IPS (Retd.), Former Principal Secretary, DM&R leh Dominic Lalhmangaiha, Former Director, DM&R te chuan State Observer angin an telpui bawk.