Aizawl: Chief Minister Lalduhoma chuan Mizoram chu rubber tharchhuahna hmunpuia chantir tumin Chief Minister’s Rubber Missions an duang chhuak tih a sawi.
Ningani khan Vanapa Hall, Aizawlah chief minister hian Land Resources, Soil & Water Conservation Department-in Mizoram CM Rubber Missions hnuaia rubber chingtute tan a chin dan, a seng dan leh a seng hnua a sawngbawl zui dan leh a kung enkawl dan zirna (scientific training) a buatsaih hawnna a hmanpui.
Rubber enkawl dan lehkhabu a tlangzarh zawhah chief minister hian Mizoramin a hmingthanpui theih thlai tha ber pakhat chu a nih thu a sawi a, “CM Rubber Missions hi mawlmang takin kal kalpui lo va, Rubber Board of India nena uluk taka kan sawiho hnu leh Tripura Rubber Missions kan zirchian hnua kan kalpui a ni,” a ti.
A tira an ruahman aia nasain hma an la tih sawiin, “A chhan pawh a ching duh kan tam vang a ni a, thil lawmawm lam a ni. In hlawhtlin ngei theih nan sorkar chuan a tih turte a ti zel dawn a, a chingtute pawhin theihtawp in chhuah hi kan beisei che u a ni,” a ti.
Training-ah hian Rubber Board of India leh Servo Lubricants (IOCL) atanga mi thiamten rubber chingtu mi 550 hnenah a chin dan leh enkawl zui dan te, a hnai dan te, a hnai sawngbawl dan bakah a kung tichhetu rannung laka ven dan te zirtirna an pe.
Mizoramah hian rubber chin theihna ram hectares 50,000 vel a awm a, rubber hi thlai nghet, ramngaw siam thei thlai, tuihna humhalh kawnga tangkai, a hralhna tha tak, a hnai theih tawh loh hnua thingzai atana hman zui theih ni si a nih avangin sorkar chuan uar zawka kalpui a tum a. October 18, 2024 khan CM Rubber Mission a din a, he mission hnuaiah hian LRS&WC department chuan kum 2025 kum tir atang hma la tanin Mamit leh Kolasib district chhunga ram 1,000 hectare-a zauah rubber tiak kung 4,50,000 phun a ni tawh a, kum 2026 hian district hrang hrang pariata ram 2,575 hectare-a zuavah tiak kung 11,58,750 phun chhuah leh vek tum a ni a. Kum nga chhung kalpui tura duan niin ram 11,500 hectare-a zauah phun khah vek tum a ni.
Rubber chinna hmunte hi kawng sialsak an ni ang a, rubber roller machine leh a hnaina hmanrua ngaihtuahsak an ni ang a, a hralhna pawh ngaihtuahpui an ni bawk ang. Kumin bikah hian rubber chinna hmun 11-ah huan panna kawngpui km 46.50 laih hman tum a ni.
Farmers Training on Scientific Rubber Cultivation, Harvesting Techniques, Post-Harvest Handling and Pest Management hi Lunglei, Hnahthial, Lawngtlai leh Siaha district chhunga rubber chingtute tan hun remchang hmasa berah buatsaih leh tum a ni.
Training hawnna inkhawmah hian Minister Lalthansanga chu khualzahawm a ni a, Dr. KC. Lalmalsawmzauva, Adviser to CM-in chief minister hi a tawiawm.