Lalnghinglova Hmar, Minister of State, Sports & Youth Services Department chuan FMSCI Indian National Motorcyle Racing Championship 2025-a an inelna huanga 2-na, K. Lalnunsanga chu MINECO-a a office chamber-ah lawmpuina hun a hmanpui a, lawmpuina pawisa fai a hlan tel.
K. Lalnunsanga, Electric Veng, Aizawl hi MRF leh Madras Motorsports Club-in a buatsaih, Federation of Motor Sports Clubs of India (FMSCI) Indian National Motorcycle Racing Championship (INMRC) 2025-ah hian Stock 130 – 165cc Novice Category-ah inelin a pum puiah 2-na a ni.
June, 2025 atang January, 2026 chhung khan round nga inelna neih niin intlansiak vawi 10 tlan a ni a, Nunsanga hi vawi hnih 1-na niin vawi li 2-na a ni bawk.
Tetea Hmar chuan, “Kan infiam mite tupawhin hlawhtlinna an chan hian sorkar chu kan lawm thin a, India ram huap ang inelnaah phei chuan Mizo tihmingthatu an ni a, kan chhuang thin a. Nunsanga pawh national level-a hetiang a thleng thei hi kan lawm hle,” tiin a lawmpui thu a sawi.
Mizoram MotorSports Association (MiMSA) hruaitute fak bawkin, “MiMSA inpekna hi a hlu a, motorsports lam hi a sensote a danglam deuh avangin a hautak hma a, Mizoram State Sports Council (MSSC)-in budget tam tak kan pe thei lo chung pawhin hruaitute lam an tang hram hram thin a, fak an phu tak zet a ni,” a ti.
Minister hian Mizote chu infiamnaah hmasawnna tur an la ngah thu sawiin, “Discipline hrang hrangah achievement tha kan nei ve ta fo va, a lawmawm a; mahse, hmabak a la thui hle a, tun aia sang kan thlen zel a ngai a. Hetia hlawhtlinna zuk neite hian a piah lama hmasawnna tur la tamzia an zuk hmu a, inzirna tur a la tamzia an zuk hrechiang thin a ni,” a ti bawk.
Dr. Lalhmuchhuaka, Vice President, MSSC pawhin thu sawiin sports association hruaitute tan chuan nihna hlawkpui tum lo va, a chang phei chuan chân zawk nih huama infiammite kaihhruai leh phurpui a pawimawh tih a sawi.
He hunah hian Nunsanga chuan an inel dan chungchangte leh a hun hman dante a sawi a. MiMSA lam pawhin thu sawiin sport minister-in a duhsakna leh ngaihsakna avangin lawmthu an sawi.