- Dr. C. Lalrampana
Public carrier hi chihrang hrang a awm, chung zingah chuan:
- Bus: Mi tam tak phur thei, route nghet taka kal thin a ni.
- Train: Rail kawng zawh, mihring leh thil phur thei, hla tak tak kal thin a ni.
- Taxi: Mi pakhat emaw, mi tlemte phur thei, chuan man tehna [fare meter] hmang thin a ni.
- Auto-rickshaw: Khawpui chhunga hman thin, mi phur thei, wheel path nei chi a ni.
- Metro: Khawpui chhunga mi tam tak phur thei, lei hnuaia kal emaw, lei chung sanga kal thin emaw a ni.
- Ferry: Tui chunga mi leh lirthei phur thei, tuipui kam leh lui kam thlunzawma kal vel nana hman thin a ni.
- Tram: Electric emaw, cable hmanga khalh, route nghet taka kal thin a ni, khawpui chhunga hman thin a ni deuh bik.
- Minivan emaw, Van: Mi tlemte phur thei, hla vak lo kal thin, group transportation atan hman thin a ni.
- Shared Taxi emaw, Ride-sharing Service: Mi tam tak phur thei, fare inthawh tawm [contribution] a pek thin a ni.
- 2 wheeler Taxi: Mi pakhat phur thei, veivah zung zung theihna chuan man mumal tak nena hman theih a ni.
- Thlawhna: Rang zawk leh awlsam zawka van boruaka thlawhna [flight service] a ni. Mirethei leh mi naran tan erawh hman ve mai mai a awlai lem lo.
Heng lirthei chihrang hrang mipuite awlsam zawka an veivah zung zung theihna tura man chawia hman theihte hi public carrier services-te chu an ni. Heng lirthei hman man, chuan mante hi Central Transport Authority [CTA] emaw, state-ah chuan State Transport Authority [STA]-in a bituk thin. Chung rate bitukte chu dik thlap leh inang tlanga a hmangtuten hman man an chawi theih nan leh lirthei enkawltuin amah hmangtu [customer/passenger]-te a bum mai mai loh nan Taxi fare metre hman ngei tur a ni. Central Transport Authority [CTA] & National Highway Authority [NHA] hian heng taxi Fare metre hman dan tur hi a ruahman thin. He ruahmanna ang thlap hian India rama khawpui lian metropolitan city-ahte chuan taxi metre hi hman mek a ni. Hetih lai hian Mizoram state hian taxi metre hi kan hmang ve ngai lo. Enge a chhan ka zawh thin taxi driver-te chuan: “ Fare metre hman hi a buaithlak” tiin Mon chhang thin a, a buaithlak an tihna chhan erawh sawifiah duh an awm chuang hauh lo. Taxi meter hian passenger leh taxi driver-te tan hlawkna a petawn thin. Passenger-te tan Fair Fare Calculation an tlan tawhna ang zela chhut a nih avangin, a dikin a rinawm bik a ni. Transparency: Meter hian fare chawi dan a tilang chiang a, passenger-te’n an hriatpui thei a ni.
No Haggling: Meter hmang hian passenger-te’n fare an pek dawnah an buai lo va, an hahdam phah zawk.
Metered taxi-te hian passenger-te harsatna a sukiang a, an kalna tur chin ngaihtha takin an thleng thei. Tin, Taxi driver-te tan chuan:
Accurate Revenue Tracking: Meter hian driver-te’n an hlawkna an hriat theih nan a pui a ni.
Increased Customer Trust: Meter hian passenger-te laka rinawmna a thlen thei a ni. Inhnialna a titlem [Reduced Disputes] bawk thin. Taxi Meter hian fare chungchangah buaina a chhuah loh nan a pui tha hle.
Improved Efficiency: Meter hian driver-te’n an hna an thawh that zawk theih nan a pui bawk. A hlawkna dangleh chu dan zawmna [Regulatory Compliance] tha tak a ni. Metered taxi-te hian dan zawm a ngai a, a him zawk bawk. Data Collection: Meter hian taxi hman dan leh traffic pattern-te a hriatpui theih nan a pui tha hle bawk.
Tin, Two-wheeler taxi-ah meter hi a vuah ve theih a, tunah chuan ride-hailing company leh taxi operator tam tak chuan GPS-based taxi meter an hmang thin. He meter hian fare chawi dan dik tak a hriattir thei a, passenger leh driver-te tan pawh a tha hle. Two-Wheeler Taxi Meter that biknate chu Fare chawi dan tur dik a hriattir a, Taxi meter hian passenger-te chu an tlan tawhna ang zela a man chawi a nih avangin, a dikin a rinawm bik a ni.
Transparency: Meter hian fare chawi dan tur a tilang chiang a, passenger-te nen an hre tlang thei a ni.
Taxi meter hian passenger leh driver-te inkarah rinawmna a siam thin. Two-Wheeler Taxi Meter tha bik feature: GPS-based: Two-wheeler taxi meter tam tak hian GPS technology an hmang a, vehicle location leh fare chawi dan a hriatpui theih nan. Digital Display: Meter hian fare, tlan thui zawng [distance traveled] leh information dang pawh a tilang thei.
Payment Integration: Meter thenkhat hian digital payment system nen an inthlunzawm thei a, passenger-te tan pawh a tha hle.
Khing atangte khian Taxi pangngai a ni emaw, 2-Wheeler taxi, Auto Rickshaw, Taxi oangngai a ni emaw taxi metre hman ngei hi passenger leh taxi neitu, khalhtute tan a pawimawhin kawng tinrengah a hlawk hle a ni. Taxi metre hmang ngam lo Kristian zaa 87.16% awmna state kan nih mek avangin taxi driver-te’n passenger-te min bum nasa thei hle tih a hriat theih.
STA-in ni 19/02/2024-a taxi hrang hrang rate a siam ang hi tarlang ila:
2-Wheeler taxi: 1 Km t. 30/- a hnu Km 1 zelah t. 20/- a ni.
Autorickshaw: 1 Km t. 35/- a hnu 1 Km zelah t. 25/- a ni.
Taxi: 1 Km t. 55/- a hnu 1 Km zelah t. 45/- a ni.
Mizoramah Taxi metre hman a nih ve loh avangin abikin 2-Wheeler taxi-te hian passenger an bum nasa hlawm hle niin a lang. Tin, District khawpuiah pawh auto rickshaw khalhtute’n passenger an bum nasa thin hle niin sawi a awm bawk. Aizawl taxi driver pakhat chuan a taxi hmangtu pa pakhat chu Zotlang-Khatla South 5.5 Km a hman tumin a man dik tak tur t. 302.50 a nih laiin t. 500/- a laksak hmiah ngam nia. A hmangtu hian a hnial pawhin a ngaihsak duh chuang lo. Mahse, inkhawm chu taima lutuk a ni awm e. Zing tawngtai inkhawm thlengin a hlah ngai lo an la tizui.
Hetiang êm êma taxi-a inbumna tamna ram Mizoramah hian engvanginnge Sawrkar hian Taxi Fare Metre hi a taka a kalpui ve ngam loht Taxi Owners & drivers-te hi a ngam lo em nit City bus pawhin mi an bum ve vak vak lem lo. Chuvangin, mipui sawrkar, ZPM sawrkar, aikal lak titawp ngam, sawrkar huaisen tak hian Taxi Fare Metre hi a rang thei ang berin a takin kalpui ve se, mipui bumna a awm lovang a, kan ram siamthatna leh hlawhtlinna ropui tak a ni ngei ang.