Dampa bialtu MLA Dr R Lalthangliana chuan Dampa bial chu Pathianin a dahna hmun a ni tih a hriatchian zual thu sawiin mipui MLA a nih tawh thu a sawi.
Dr R Lalthangliana hian Inrinni khan a bial chhung, West Phaileng veng chung, New West Phaileng leh |uahzawl a tlawh a. Dampa bial chu Pathianin rawngbawl tura a dahna hmun a nih angin party pakhat chauh MLA ni lo, mipui MLA, mi zawng zawng tan hnathawh a tum thu a sawi.
Dr R Lalthangliana chuan tuna sorkar mek ZPM hian campaign lai khan an rilrua awm, tha tura an ngaih apiang thil tam tak mipui an tiam a, hneh takin an tling a. An sorkar hnuah beisei leh rin angin thil a awm thei leh si lo va, a ngaihna an hriat loh avangin an sawi ang khan an kal leh thei ta lo va. Sawi loh ang hlira an awm avangin mipuiin anmahniah rinna an nghat zo ta meuh lo va, ‘balu chunga ui bawk’ an sawi ang maiin, inthlan a piangah an hniam zel a, an sorkar vanglai takin election apiangah an tla zel tih a sawi.
ZPM chu a tlahniam leh chhuk zawng hlirin an kal tih sawiin, “MNF chu a chho zawng leh hmasawnna lam panin kan kal zel thung,” a ti a. MNF sorkar khan tih dik loh an nei ang a, mihring chu insiam thaa hmasawn zel tur an ni a, a tha lo lai kalsanin hma lam pan zel tur an ni tih a sawi bawk.
Inrinni vek khan MLA hian West Phaileng PHC tlawhin thawktuten tul leh mamawhte an thlen chu puih a inhuam thu a hrilh a. Krismas vuakvetah duty an indaih loh avanga nurse pakhat an lak belh hlawh a peksak bakah hospital poor fund atan pawisa fai a hlan nghal bawk.