Aizawl: MPCC General Secretary Lalroenga chuan BJP-in Mahatma Gandhi hming lanna tihtawp vek an duh avangin ni 100 inhlawhna an khawih buai chho mek tih a sawi.
MPCC in nimina Congress Bhavan-a chhung inkhawm an neihah thu sawiin Lalroenga chuan, Nehru leh Mahatma Gandhi te’n ram an kaihhruai lai khan ram ropuite zingah an tel a, hruaitu tha tak an nei a, a then an lo upat hnuah hruaitu an inthlak chhoh laiin BJP, Hindu sakhaw beltu lo ding chhuakin, sum leh paia mipui rawk zawngin an lo chhuak tih a sawi a. Congress sorkar laia gas bur khat Rs 445.30 man kha zaa 90 in a pung a, tuialhthei man Rs 5 chuangin an ti pung bawk a, VAT duh tawk lovin GST an la a, 4/100 duh tawk lovin 12/100 % an la ta a, mipui an rethei tawlh tawlh tih a sawi.
Lalroenga chuan ni 100 in hlawhna lamah pawh sakhaw la bing tu ten, Mahatma Gandhi hming lanna duh lotu BJP-in Mahatma Gandhi hming lanna reng reng tihtawp vek an duh a, ni 100 inhlawhna an khawih buai chho mek tih sawiin, “BJP leh an thurualpui te state-ah chuan Mahatma Gandhi hming leh hmel lanna, a lim thlengin an dah bo mek a, kan state-ah ngei ngei pawh State Bank bula Mahatma Gandhi lim pawh MNF hunlai atangin an dahbo a ni,” a ti.
MNF leh ZPM in dawt an ngam em em mai chu a huatawm tih sawiin MPCC general secretary chuan, “Kan naupan lai atang tawhin thian dawheh kan kawmserh a, kan pi leh pute pawn an do thin. Bible-ah pawh hmui dawthei hi Lalpa ten zawng tak a ni tih te, a duh loh zawngah pawh a tel,” tiin, dawt sawi hrim hrim leh mahni hamthatna tura mi phiarru anga tih te chu an elpui ten an tuipui tih a sawi bawk.