Jammu & Kashmir-a Kishtwar, tlang leh ruam khawkrawk tak laia mi firfiakte nen an inbeihnaah Indian sipai pasarihin hliam an tuar.
Sipaite hi Kishtwar-a Chatroo-ah anmahni kaptute bei let tura thawk chhuak an ni a, an inkah tawn hle hnuah hliam tuarte hi damdawi ina hruai turin an la chhuak fel tawh.
Indian Army-a Jammu-a awm, White Knight Corps-in beihpui an thlak hi ‘Operation Trashi-I’ tia vuahin Pathianni chhun lai vela an tan a ni.
White Knight Corps hian sipaite hi Jammu leh Kashmir Police nen tanghova heng lai vel dap chhuah beihpui an thlak mek laiin firfiakte nen hian Chatroo hmarchhak deuh, Sonnar-ah an intawng niin X-ah an tar lang.
“Sipai inchah belh luh niin beihpui thlak chhunzawm zel a ni a, a hmun hi mi dang luh leh chhuah theih loh tura khar phui vek a ni a, sorkar thuneitute leh venhim hna thawktu pawl dangte pawhin an pui bawk a ni,” an ti a. A hmunhma hi rem lo tak ni mah se sipaite hi a chan tha zawkah an tang niin an tar lang bawk.
Thuneituten an sawi dan chuan mi zawngtu team zinga pakhat chu ram dang mi firfiak, Pakistan-a Jaish-e-Mohammad (JeM) mite ni ngeia hriat nen inkawng fuhin an lo kap a, grenade pawhin an vawm bawk niin an sawi.
Sipaite hian an kap leh a, sipai, Central Reserve Police Force (CRPF) leh police an thlen belh bawk a. Hun eng emaw chen an inkap zui niin an sawi bawk.
Drone leh uisathiamte pawh hman a ni a, hei hian hma an lak meknaah kawng tam takin a pui a ni.
Tun hi kumina Jammu-a mi firfiakte nena inkah a thlen vawi thumna a ni ta a. January 7 khan Kathua district-a Billawar huam chhung, Kahog leh kar hmasa Thawhlehni khan Najote ramngawah an lo inkap tawh bawk a ni.
December 15 khan mi firfiakte nena Udhampur inkahnaah police officer kah hlum a lo ni tawh a. A kaptute hi ramngaw chhah tak leh thim chu remchangah hmangin an bibo thei hlauh thung.
He thil thlen hnuah hian venhim hna thawktute chuan Jammu-ah hian beihpui an thlak zui a, heng lai velah hian mi firfiak 36 vel tawm niin an ngai a. Heng mite hi Republic Day lo thleng tur lawmna tihbuai tum nia ngaih an ni a, Pakistan-a awm anmahni puitute pawhin tam zawk tirh luh tumin hma an la mek bawk niin an sawi.