Aizawl: MNF Gen. Hqrs PAC member R Lalzirliana’n Chief Minister special package chu Lalduhoma special package-a thlak a rawt.
Thawhtannia MNF Hnam Run chhung inkhawmah thusawiin R Lalzirliana chuan, “ZPM mite tan chauhva chief minister special package hi hmantur anih dawn chuan, Lalduhoma special package, tiin thlak mai rawh se. Hetianga an thutiam an bawhchhiatna langsar taka an tlangaupui ta mai hi, Pathian leh mipui pawikhawihna a ni a. Val Upa Council an tihte inrawlhna awm tak anih laiin, an ngawi thap lawi si a ni,” a ti.
Kohhran hruaitu leh hotu eng emaw zat awmna ZPM party chu a nghet lo hle tih sawiin minister hlui R Lalzirliana chuan, “An sorkar hnua inthlan apianga an chaklo zel hian hei hi a ti chiang a ni. Israel faten ringlo mite nen puanzar an inzawm hnua Pathian pawi an khawih ang khan, an thutiam an bawhchhiatna hi Pathian pawi an khawihna a ni a. Anmahni thusawi hi anmahni vekin an hnial leh thin,” a ti.
Policy & program chik peih leh zir peih an tam tial tial avangin thu belhchian dawl lo leh dawt thu sawi hi miten an chhinchhiah a, a hun leh hmun nen an vawng tha khiau thin. Thu chauha ZPM ten an sawi, kalphung thar, an tih hi a takah hmuh tur a awm lo va, an danglamna hriat tur a awm heklo. CM, minister leh an MLA ten sorkar hmasa leh midangte demna leh sawiselna tel lovin thu an sawi hleithei lo tih a sawi bawk.
P&E minister hlui chuan ZPM-in hma an lak vena lianthiam deuh chu MNF sorkar hun laia bul lo tan tawh, engkim lo ruahmansa vek tawh a ni zel a. Thenzawl solar plant, Sumsuih solar plant leh Tuirini khuah tura hmalak mekte pawh MNF ruahmansa leh thui tak a lo kalpui tawhsa tih a sawi a. Tuirial hydel project chungchanga sorkar hmasa leh engineer te an demna pawh thil an hriat fuh tawk loh vang leh siam that theih a nih hun laia hma an lakloh vang a ni tih a sawi bawk.