Aizawl: Adviser to Chief Minister TBC Lalvenchhunga chuan Indian Air Force (IAF) hnena Lengpui ram hralh chu sorkar hmasa huna teh fel leh tihfel vek tawh tih a sawi.
Thawhtannia an party pisa-a ZPM chhung inkhawmah thu sawiin TBC Lalvenchhunga, MLA chuan journalist HC Vanlalruata’n tual chhung chanchinbu pakhata ‘Lengpui Ram IAF hnena hralh’ tih a ziah a zangnadawmna Rs vbc 187.90 dawn chungchang chu sorkar hmasa huna tihfel vek a nih thu a sawi a. IAF ram lei leh hralh chu Lengpui ram chauh ni lovin, Sihphir ram acre 5 a tel tih a sawi bawk.
TBC Lalvenchhunga chuan, “He thil hi kan sorkar hma thil a ni a, Assembly House leh Ignite Studio-a party tinte sawihonaah ka sawi chhuak tawh bawk. Sorkar hmasa huna teh fel leh tihfel vek tawh a ni,” a ti a. ZPM sorkar hunah zangnadawmna pawisa chu sorkar laipui atanga thlengin pek a nih thu a sawi.
TBC Lalvenchhunga chuan sorkar hnen thleng loa ram hralh theihna DC ‘level’-a a zo vek thei chu mak a tih thu a sawi a, “Ram hi direct-in an lei a, sorkar thleng loa DC level-ah a zo vek mai a, tun IAF ram leiah pawh hian DC level-ah a tawp vek. Direct purchase a ni a, DC hian collector an nih avanga final mai an ni a, Rs vbc 187.90 khan an hralh thei tlat a ni,” tiin ram hralh leh zangnadawmna chungchang a sawi.