Aizawl: Ombudsman C Lalthanmawia chuan Ombudsman (Independent Local Body) chu mipuiin chhawr tangkai se a duh tih a sawi.
Thawhtanni khan Ombudsman C Lalthanmawia chuan a pisa-ah thu thar thehdarhtute kawmin, an hnathawh tlangpui a sawi fiah a. Ombudsman, State of Mizoram chu tualchhung rorelna inkaihhruaina, village council leh municipal bodies atanga thuneihna insemzai te, hlemhletna leh thil dik lo/fel lo awm lova rorelna dik tak ram leh mipui tan kalpui a nih theih nana Mizoram sorkarin Act & Rules mumal tak siama din a ni tih a sawi.
C Lalthanmawia chuan Ombudsman (Independent local Body) chu mipuiin khawtlang roreltute (village/local council) te rorel dan leh kalphung bakah an hmalak dana sawiselna/lungawi lohnate thlena an zualko theihna tura din a nih angin, mipuiin chhawr tangkai se a duh tih a sawi.
C Lalthanmawia chuan Ombudsman, State of Mizoram chu mahnia ro inrel a nih angin, tun dinhmunah a nih tur angin kalpui a la ni lo tih a sawi a. Budget pawh a hranpaa nei tur an nih laiin an la nei lo tih a sawi.
Thu thar thehdarhtute zawhna chhangin C Lalthanmawia chuan, kum 2013-a Ombudsman din tirh a nih atanga vawiin thlengin lungawi lohna (complaint) thlena zualko 76 an awm tawh tih a sawi a. Lungawi lohna thlena zualko zingah political party anga politics kaihhnawiha zualko an tam ber a, criminal case anga kalpui chi lut erawh a la awm lo tih sawiin, fund hman dik loh avangte, zangnadawmna vang pawha zualko lut an awm tawh tih a sawi bawk.