NBA huanga inhnialna tawp thei lo chu player ropui ber chungchang niin, thenkhatin Michael Jordan an dah ropui ber laiin LeBron James an dah ropui ber an awm bawk a. He inhnialnaah hian Shaquille O’Neal-a chuan Jordan a thlan zawk thu a sawi.
Jordan hi vawi 10 champion a ni thei a, MVP pawh vawi nga a nih theih bakah Finals MVP vawi ruk a ni bawk a. Kum 1990 chho velah kha chuan han hnaih pha an awm lo tiin a sawi theih a, Chicago Bulls chu Finals-ah 6-0 record a neihpui thei a ni.
James chuan kum 20 chuang NBA huangah hun a hmang tawh a, he mi chhung hian record chi hrang hrang a siam hnem tawh hle a. Point score hnem ber record te, game khel hnem ber record te siamin tunah hian a season 23-na a hmang mek a ni.
O’Neal chuan Jordan vanglaiin a hmachhawn hman a, James a khelhpui hman bawk a. Hetianga khawvela basketball player ropui ber tia chhal ve ve te chu court chhunga a hmelhriat dun avangin a ngaihdan hriat châk an tam phah hle.
Tun hnaiah khan basketball player zinga tha a tih zual 10 a thlang chhuak a. Dr. J, Tim Duncan, Hakeem Olajuwon, Larry Bird, Wilt Chamberlain, Bill Russell leh Magic Johnson te hming pawh a lang a, ama hming erawh a telh ve lo thung.
Tha a tih dan indawta a dah chuan O’Neal-a chuan Jordan chu a chungnung berah a dah a. A teammate hlui, Kobe Bryant chu pahnihnaah dahin, James chu pathumnaah a dah thung a. A ngaihdan hi James dah chungnung berte chuan an lawm vak a rinawm lo hle.
A vanglaiin O’Neal hian basketball player ropui ber tia sawi pahnih vul lai a nang leh hman a ni.