Aizawl: Sorkar laipui Ministry of Information & Broadcasting hnuaia Press Information Bureau (PIB), Aizawl chuan Thawhlehni khan Serchhip Press Club-ah chanchinbumite leh khawtlang hruaitute pualin ‘Viksit Bharat – Guarantee for Razgor and Ajeevika Mission (Gramin) Act 2025’ leh ‘PM Vishwakarma Scheme’ zirhona a buatsaih.
Serchhip District Addl DC Lalrinzuala chuan khuallian niin a hmanpui a. Vartalap kaltlangin central scheme chu mipuiten an hriat theih phah a beisei tih sawiin hmalaknate chu mipuiin an hlawkpui ngei theih nana district khawpui mai ni lo, hmun kilkhawr thleng phak a nih theih nan theihtawp chhuah a tul a, sorkar mai ni lo tlawmngai pawlten tan lak an lak tel a ngai tih a sawi.
Addl DC chuan sorkar laipui scheme a nih angin mipuiin chipchiar taka an hamthatna tur hrang hrang an hriat theih nan puan chhuah tam a pawimawh a, scheme hrang hrang chu Mizoramah hlawhtling tak kalpui anih theih nana mi tin zirtir tura tanrual a ngaih thu a sawi bawk.
PIB hotupa Dr. Rajeev Lourembam chuan, sorkar laipui scheme pawimawh pahnihte chu khawpui atanga thingtlang kilkhawr thlenga chengten chiang zawka an hriat theih nan zirhona chu buatsaih a nih thu a sawi a; zirho tur scheme chu mipuiten an tangkaipui ngei a beisei thu a sawi.
Inkhawmah hian Serchhip Joint Village Council Chairman R. Sanghmingthanga leh Serchhip District MJA President C. Lalhminghlua te bakah, Serchhip Joint VC, MHIP leh Sub. Hqrs YMA hruaituten thu an sawi a; chawhnu lamah Serchhip ARDO Stephen Laltlansanga Auhmun chuan G-RAM-G Act, 2025 chungchang a sawifiah a, Serchhip Commerce & Industries Dept atangin C. Vanlalhriatpuii’n PM Vishwakarma Scheme chungchang kalkhawmte a zirtir bawk.