Aizawl: Home Minister K Sapdanga’n home department hnate tlin taka thawk tur chuan hna lak atanga uluk a ngai tih a sawi.
Thawhlehni khan Home Minister K. Sapdanga hovin Planning & Programme Implementation Department Conference Hall, Treasury Square-ah an thukhawm a. 2025-26 chhunga Home leh a kaihhnawih department hrang hrangte hnathawh leh hmasawn dan te thlir letna leh a kum leh atana hmathlir te sawi hovin an thukhawm.
Thutkhawmah hian Home Minister chuan, Home department leh a chhung a department hrang hrang ten mawhphurhna intawm an neih chu Zoram mipuite ralmuanna tura dan leh thupek ken kawh te, ramri venhim leh state pawn atanga lo lutte mumal taka lo kaihhruai te a nih avangin department pawimawh zual bik zinga mi, mawhphurhna sang bik leh office pawn lama hna ngah zawk an nih thu a sawi a. Home department hnate tlin taka thawk tur chuan hna lak atanga uluk a ngaih thu sawiin, ram tana nasa leh zuala thawk chhunzawm zel turin kalkhawmte chu a chah.
Thutkhawmah hian Home department, Mizoram Police leh Fire & Emergency Services te, Prisons, MRHG&CD, Sainik Welfare & Resettlement bakah Forensic Science Laboratory hotute hnen atang kum kal ta a an hnathawh thlirletna leh hmachhawpte an thlirho a ni.