Health Minister Lalrinpuiin hmarchhak bial chu khaw mawng ping – landlock tia sawi tawh lovin, tlawhpawh ram – land linked tia sawi tawh turin a chah.
Bangalore-a Christ University buatsaih, ‘Libernum 2026 – International Conference on Northeast India at the Crossroad:Inclusion, culture and a sustainable future’ neih mek chu health minister chuan khuallian niin nimin khan a hmanpui a. thalaite hnenah hmarchhak bial chu khaw mawng ping (land locked) tia sawi tawh lovin, tlawhpawh ram (land linked) tia sawi tawh turin a chah a. Agartala-Akhaura rel kawng te, Kaladan Multi-Modal Transit leh Asian Highway te avangin kawng engkimah kalpawhna a tha tawh hle tih a sawi.
Hnam nunphung leh culture-te chu museum-a dah that mai mai tur a ni tawh lo tih sawiin Lalrinpuii chuan, khawvel economy inelna sang takah hian ‘Intellectual Property’ hlu tak a ni tawh zawk a. An puancheite leh ram hnim damdawite hi khawvel mamawh, a hlutna sang tak a ni tawh tih a sawi a. 4G leh 5G than chhoh zelna zarah, Mizoram kilkhawr bera cheng zirlaite leh Bengaluru-a awmten thiamna leh hriatna inang an dawng thei tawh a. Hei hi ‘Inclusive Governance’ dik tak chu a ni tih a sawi a. Hmasawnna leh hriselna chu damdawi in tam lam ringawt ni lovin mahni rama awma eizawnna ngelnghet neih theihna a ni tih sawiin, Aizawl atanga London thlenga thil thawn chhuak thei thalai entrepreneur-te hi hmasawnna dik tak chu an nih thu a sawi bawk.
Health minister chuan hmarchhak chu India ram boruak thianghlim petu a nih avangin hmasawnna an kalpui dan pawh a danglam a ngai a. Eco-tourism te, Carbon credits te leh energy thianghlim hmanga hma lakna chu hmar chhak innghahna tur a nih thu a sawi bawk.